War ma nemmeslay-d tazwara ɣef yiselmaden d tselmadin i iwalan annect-nni deg wannar, deg yiɣerbazen yemgaraden, ahat ula d wid yeṭṭafaren aḥric-a n usegmi (éducation), neɣ d wid iḍefren igmaḍ ineggura n BEM d BAC, walan amek i d-tufrar tewtemt deg tqacuct s yigmaḍ-is igerrzen. Aya, mi ara d-nuɣal ɣer deffir, ad naf yebda-d iseggasen-a ineggura kan. Neɣ s wawal-nniḍen, yebda-d segmi yettwakkes kra kra lqid i d-yettwaḥettmen deg wayaqeddac ɣef tmeṭṭut, yugi-as ulamma ad terfed allen-is deg wakud atrar, awessar. Ihi, seg yiwet n tama, aṭas i yettwalin ayen akka i la txeddem tewtemt yekka-d seg kra n tlelli n uxemmem d usenfali i as-yettunefken. Imi tura tekcem deg yiḥricen yemgaraden am nettat am urgaz: asegmi (éducation), tasnujjya (médecine), taɣellist (sécurité), tussna (science), akked tfelseft (philosophie) akka cwit, d waṭas n yiqeddicen wiyaḍ. Ɣef tmuɣli n yiwen n uselmad i nesteqsa, «yekka-d waya daɣen seg uɛaned i tettɛanad tmeṭṭut argaz ad t-tecbu. Am tin i yebɣan ad d-tbin, ad d-tbeggen iman-is, tella s wazal-is d tameṭṭut». Seg tama-nniḍen, iban-d ur teẓwir aṭas teqcict deg yifurak (filières) n tussna. Ɣas ma, ɣef wakken i d-yewwi wadeg n Internet Slate, ssawḍen deg tesdawit n Wacinṭun i yiwet n tezrawt i d-yeqqaren d aqcic i d sebba n waya. Iban-d llan kra n yisdawanen stehzayen s tzemmar n tesdawiyin deg uḥric-a n tussna, almi llant kra ttkukrunt, neɣ ur bɣint akk ad t-ḍefrent.
Maca wissen lemmer ad d-nemmeslay s yisem n tussna anwa agmuḍ i ara d-naf i usteqsi-nneɣ amezwaru?
Mhenni Khalifi