Wissen melmi ara tekfu ‘’deεwussu’’ ? Qrib yal ass tettili-d twaγit deg ubrid n taddart n Tala Athmane. Amur ameqqran n laksidat-agi ttelint-d imi sekkren wid inehren ṭunubilat-nni. Ugar n 6 twaγiyin i d-yeḍran si lεid γer wass-a, glant-d s lmut n 3 yimdanen akked yimejraḥ i yellan di sbiṭer mazal ur d-ukin ara (ha-ten-in di lkuma). Ddurt iεeddan d yiwen ukamyun, dγa, i idehmen sin yilmeẓyen n taddart-agi (A.D 35 yiseggasen di leεmer-is akked H.T 19 yiseggasen). Ilmeẓyen-agi llan leḥḥun abrid abrid am yal iḍ mi i ten-yedhem ukamyun. Yiwen yessufeγ tarwiḥt din din, wayeḍ wwin-t γer sbiṭer ; ha-t-an gar tudert d lmut. « Yal iḍ, am wakken i tt-sεan d lεada, ad d-aγen kawkaw neγ lḥağa n lmakla, ad leḥḥun ad ttḥewwisen ad tetten di sin yid-sen deg ubrid n Lekḥali. Ass-a, teḍra yid-sen twaγit sebba-s d ssekran n winna inehren yerna ur d-iban ara. Xas ma yerwel imir, ilaq ad iruḥ γer yiğadermiyen ad asen-yini.» Akka i aγ-d-yenna gma-s n uqcic-nni yellan di le coma. Σlaḥsab n yiwen yilemẓi i iwalan amek teḍra twaγit, yenna-d dakken mi ten-yedhem ukamyun-nni (akamyun H100 ?), yeḥbes, yerres-d yiwen, iwala kan akken, yuγal dγa rewlen. Llan di tlata daxel ukamyun, γef wakken i d-yeḥka. Meεna yesḥassef imi ur yezmir ara ad iwali di ṭlam la matricule n ukamyun-a. Akken kan yemmeγ lexbar di taddart, yeččur-d umekkan-nni d lγaci ula d iğadermiyen ur d-wwiḍen ara γer umekkan tikelt tamezwarut imi d-walan anect-nni n yimdanen, kukran. Armi ḍelben deg-sen ad tixren deg umekkan i d-usan.
Hocine. M