Karim Addar, d anaẓur ameqqran deg cnna n teqbaylit tatrart. S ssut-is aḥnin i yettcebiḥ tizlatin-is, i yezzuzunen ulawen-nneɣ. D yiwen gar wid-ak yettnaḍaḥen, i wakken ccna n teqbaylit ad yaweḍ ɣer tqacuct. D yiwen n yilemẓi i d-trebba tezlit taqbaylit taqburt; imi iḥemmel aṭas tamedyazt i d-yefken afud i cnna n teqbaylit. Ilul ass n 05 maggu deg useggas n 1975, deg taddart n Uεfir, deg taɣiwant n Bujimaε deg temnaḍt n Wagennun, deg lwilaya n Tizi Uzzu. Yebda cnna asmi yesεa tẓa neɣ mraw iseggasen deg leεmer-is. Yeɣra aẓawan ɣer tiddukla n “Les Beaux Arts” n Lezzayer tamanaɣt, seg useggas n 1998 almi 2000. Iban-d ɣer unnar n tẓuri deg useggas n 2005 s uḍebsi-is (CD) amezwaru, iwumi isemma ‘’Tamedyazt’’. Ass-a, ilemẓi-agi n ukuẓ n tmerwin d yiwen (41) yiseggasen kan deg leεmer-is, ɣur-s semmus n yiḍebsiyen “CD” deg ssuq. Amezwaru d win-a n 2005 (tamedyazt), ideg llant 6 n tezlatin: Aεessas, tameɣra, awal-iw…atg Deg useggas n 2007, yerna-d aḍebsi-is wis sin, win-a iwumi iga “Fhem-iyi” d azwel, llant deg-s sa (07) n tuɣac. Ma deg useggas n 2009, yeslul-d aḍebsi-is wis kraḍ, iga-as azwel “Awi-iyi», ideg yecnna ṣa n tezlatin. Syin akkin deg useggas n 2011, yerna-d tasefift-is tis ukuẓ, iga-as isem: “Beddeɣ”. Sakkin, yeqqim ukuẓ n yiseggasen i wakken ad yernu aḍebsi-ines wis semmus (05) deg useggas n 2015, isemma-as “Ẓriɣ», iger-d deg-s 8 n tezlatin. Dɣa s uḍebsi-agi aneggaru n 2015 i swayes yettwassen aṭas, yis i d-yuwi amkan-is deg unnar n uẓawan atrar n teqbaylit. Ma d ayen yerzan isemtal iɣef yettaru tamedyazt-is neɣ i yecnnu deg tuɣac, ad d-nebder gar-asen: Tayri, Leɣreba, Lmut, Lmeḥna, Lefraq, d tmetti s umata … Tura akka ha-t-an la yettheggi aḍebsi amaynut, ara d-yeffɣen deg useggas n 2017. D tajmilt i Ḥusin Ayt Ḥmed, isemma-as “Aẓekka, ajdid yessewḥac”. Ad d-nesmekti kan d akken anaẓur-agi ameqqran Karim Addar, icennu tamedyazt yettaru netta s timmad-is, am akken daɣen i icennu isefra n imedyazen-nniḍen yecban: Ḥamid Mwalḥi d Urezqi Akruf.
Adaoun Abdelghani