Seg wayyuren-a iɛeddan, yeqqel umedyaz ilemẓi mmi-s n Sidi Ɛic, Yusef Haruni, am tzizwit deg tefsut. Akken ad yessiweḍ i yimeɣri ammud-is amezwaru n yisefra, iwmu yefka azwel « Asirem », icala war ɛeyyu ɣer ddeqs n waɣiren (tiwilayin) n tmurt anda iga tinezzuyin n ubuddu (ventes-dédicaces). Gar-asent, ad d-nebder Bgayet, Tizi Uzzu, Tubiret, Lezzayer tamaneɣt, Tabatent, Wehran, Tablidt, d kra n twilayin-nniḍen n usamar.
Imi yeẓra amek tella tmetti tura, d wacu i d abrid igerrzen n umedyaz, neɣ n umaru n wass-a, akken ad yessiweḍ asnulfu-ines i yimeɣri, yuzzel Yusef iḥerrek i temlilit n medden deg yal ttiɛad adelsan i d-yettilin. «Lḥiɣ aṭas s udlis-a akken ad t-senzeɣ. Netta d isem-is i d anamek-is, imi azwel-is Asirem. Ihi, ɛerrḍeɣ ad zzuzreɣ asirem ɣer wanida lfiɣ. Deg 32 n yisefra i yellan deg-s, rriɣ tajmilt i kra n yizumal am Lwennas n Ayt Lewnis (Meɛtub) akked Sliman Ɛazem». D awal-a i aɣ-d-yenna umeskar ilemẓi Yusef s umata. D ammud, dɣa, i d-yettawin ɣef tmagit (identité), tilufa d yiɣeblan n ddunit, rnu-as ciṭṭuḥ n tayri ɣer taggara. D acu, ɣas yewweḍ udlis-is 21 n twilayin ar iḍa, yesḥassef ayendin Yusef imi ur yelḥi udlis-is di Bgayet am temnaḍin tiyaḍ.
Mhenni Khalifi