Akken kan uɣalen warrac s aɣerbaz u bdan keccmen deg tannumi n useggas amaynut 2016/2017, yenneqlab fell-asen waddad. Deg ddurt iɛeddan, teḥbes leqraya deg yiɣerbazen n Ayt Smaɛel, qqimen yinelmaden sin n wussan war timsirin. Aya, yuɣ lḥal yekka-d seg yisundiden (grèves) i gan kra n yiselmaden i tikkelt tamezwarut segmi tfukk teswiɛt n kraḍ n wayyuren n yimuras. Iselmaden-agi, ɛla ḥsab ayen i d-qqaren, yella-d wugur i ten-yeǧǧan ad beṭṭlen lawan-a aseḥfeḍ, imi ur msefhamen akken ilaq akked sindika i d-yettmeslayen s yisem n uɣlif n usegmi. Meḥsub, iɣaḍ-iten lḥal ɣef wayen i ten-yeɛnan. Ttwalin iman-nsen, ur wwin azref-nsen amek i t-bɣan. Yezmer mačči d yiwet n tɣawsa i d-cerrḍen yiselmaden-nni bac ad uɣalen ɣer umahil-nsen. Ad d-nebder seg-sent, asuter i ssuturen ad asen-rnun adrim i tmayyurt-nsen, acku tin i d-teṭṭfen ur ten-tseɛɛed ar tura. Kkaten ladɣa ad ffɣen tastaɣt (retraite) deg semmuset n tmerwin (50) n yiseggasen. Ɣas ma mgaradent ahat ssebbat i yellan deffir useḥbes n tɣuri, ur yettwazdi yiswi, maca tikti n yisundiden mtawan fell-as. Daymi nessaram ad tefru taluft s lemɣawla, ad uɣalen waman i yiɣeẓran-nsen. Imi ma teqqimliḥala amek tella, ma yettwakemmel uxdam n yisundiden-nni amek i d-qqaren, tagnit ad tewɛer ugar. Dɣa, annect-a yesmektay-aɣ-d ɣef yilindi asmi tettwaḥbes leqraya aṭas n wakud akken reqqɛen yiɣilifen. Izerreɛ daɣen asḥissef ɣef warrac-nneɣ, acku akken yebɣu yili lḥal, d nutni i d iseflan imezwura n yiɣimi-a i yettuḥettamen fell-asen.
Kaïsa Khalifi