Mazal ar ass-a necfa γef wasmi yeḥzen ğerğaer, 34 n yiseggasen i yezrin γef wasmi i d-teḍra txazzabit n tmenγiwt tamezwarut n yimṭurfa deg tesdawit n Ben-Ɛeknun Lezzayer tamanaɣt, ass n 2 deg unbir 1982. Kamal Amzal, yemmut d ameγras γef tugdut, γef tmaziγt. Ilul Kamel amzal di tmunnent n tmurt n Lzzayer, deg useggas n 1962 di Tiferdud (At-Buyusef), d anelmad deg tesdawit n Ben-Ɛeknun, iruḥ d asfel amenzu s ufus n yimṭurfa i iqeddcen i lfayda n ukabar-nsen daxel n tesdawit. Tasaεet, tella d 8 tmeddit, Kamal Amzal iεelleq yiwen n wulγu di lḥiḍ. Ulγu-agi, yessawal i unejmuε n yinelmaden i usbeddi n tesqamut ara yessuddsen leqdic. Imeccaḥen n yidammen ur t-zgilen ara, acku muḥal umnen s tidet, umnen s uγurru.Di tjeğğigt n temẓi swezlen-as leεmer, anagar 20 yiseggasen i yesεa. Nγan-t s ujenwi wid ur nettuggad Rebbi. Kamal Amzal, muḥal yekna i yimesbaṭliyen-agi, yettḥarab γef tiktiwin-ines i icudden γer yidles amazi&gamma,; γer tlelli d tidet, γer tugdut akked yizerfan n umdan, dγa yemmut fell-asen. Iεdawen n tmurt, mačči n wass-agi kan neγ n yiḍelli kan. Wid i issexnunsen Kamel Amzal iḍelli i ixenqen tamurt ass-a. Ggulen ur yuli yiṭij γef tmurt, ggulen akken ad gezmen yal axalaf, ggulen ad sexsin yal taftilt iceεlen. Wid i d-iγeḍlen rrehba γef tmurt n Lezzayer εzizen sexdamen ddin n tneslemt akken ad samnen imdanen, ad ddun deg lğerra-nsen. Ssaγen ajeǧğiḍ-nsen i yal tamnaḍt n tmurt, dγa reṣṣan iman-nsen maca nutni ur tt-bnin ara γef tidet, yal taγawsa-nsen d akellex. Wid yeččuren d tayri n tmurt wwten s tezmert-nsen, begnen-d ayen yellan deg-sen akken ad bnun tamurt, ad teddu γer sdat.
Islam Bessaci