Amaru
Racid Buxerrub yettaru s tmaziɣt. Isuffeɣ-d yakan yiwen n udlis, isemma-as “ Tislit n uɣanim”; yuwi yis-s arraz aseklan Assia Djebbar n wugal amaziɣ deg useggas 2015 (SILA wis-20).
Agzul
Ungal n Racid Buxerrub yules-d tudert n Fafuc, yiwet n n tmeṭṭut taqbaylit i wumi tennegza tmeddurt deg wul-is. Tezga tettnaɣ d unezgum. Seg temẓi i tebda lḥif; d win i tt-itebεen armi meqqert. Ur terbiḥ la ɣef zzwaǧ amenzu, la ɣef wis-sin. Cwi kan tella cwiṭ nni n nnmara swayes tettagar urfan. Taggara, teḍra-as am yefrax-nni n Colleen McCullough, teffren akken ad mmten. Mi wessert, temmut iman-is; ḥaren medden ad walin tidet n tmettant-is.
Tasleḍt
Aḍris yeččur d igulen. Llan wid n tira tumrist, llan wid n tjerrumt. Wid n tira tumrist ama kkan-d seg usemres n tmacinin (ttemlilin yisekkilen, teffren ɣef wallen), ama seg lexsas n uqader n yilugan n tira, zgan sadaren azal n ufaris imi d-ggaren anida ur ilaq, ttnamaren imeɣri deg wayen ur nelhi. Wid n tjerrumt, deg taɣult n tefyirt neɣ deg tin n tezḍawt taḍrisant, seg wakken ggten, iban uɣen-d aẓar seg tmussni n tutlayt; ur asen-ufiɣ ara ssebba nniḍen.
Deg wayen akka ara d-yernun, ad d-alin kra n yimedyaten ara d-yemlen amek i tedda tira deg wungal-a. Tazegrawt gar yisebtar teskan-d annect meqqer ucerrig.
1. Igulen n tira tumrist:
Yal asebter yuwi amur-is seg yigulen n tutlayt. Ggten armi tuɣal tɣuri d anamer, tessenzaf imeɣri.
1. 1. Igulen n usemres n tmacint
Tikwal akka, ttilin yigulen ula deg yidlisen i d-yeffɣen ɣur tiẓrigin mussnawen. Γas yerked useɣti, mačči d winna n uwt εeddi, teccḍent tira. Deg udlis-a, wissen ixus useɣti neɣ ulac maḍi. Ma yella tezri fell-as tiṭ n umeḥḥes, isefk ad d-iban amek akka i tḍerru teẓrigt n udlis amaziɣ.
Md : iswaqi (ilaq : i sswaqi); yarna (ilaq : yerna) (sb. 9)
1. 2. Igulen n yilugan n tira
Igulen n tira tumrist diɣen ggten. Wigi kkan nnig n tutlayt akken tt-id-gelmen yimassanen, ama deg wawal ama deg beṭṭu n wawalen deg tefyirt.
1. 2. 1. deg yiwen wawal
Yettkemmil…