Taddart n Akaoudj d yiwet seg 23 n tuddar n tɣiwant n Ait Aissa Mimoun i d-yezgan deg ugafa n tɣiwant-agi, tebԑed ɣef temdint n Tizi Uzzu s wazal n 10 km.
Taddart-agi, mazal ar ass-a n wussan, tettidir lexsas d ameqqran deg yiḥricen d yisenfaren yemgarden n tudert tatrart. Gar-asen : ttawil n Internet, lgaz n temdint, yir liḥala n yibrdan, asezdeg n twennaḍt, imḍiqen i yilmeẓyen akked uɣbel n waman. Ssuturen yimezdaɣ n taddart n Akaoudj deg yimḍebren teεna temsalt, ama d wid n usqamu aɣerfan aɣiwan (APC) n Ait Aissa Mimoun, ama d wid n lwilaya n Tizi Uzzu, i wakken ad d-rren lwelha-nsen ɣer yimezdaɣ n taddart-agi yenḥafen aṭas si yal tama. Menbeεd mi ttidiren akka tura deg tegnatin qessihen. Ma d iɣeblan i d-ttmagaren kul ass, deg tazwara, ad naf aɣbel n waman n tissit, imi ufan-d iman-nsen ttnadin ɣef tiqit n waman anida ara tt-id-awin, acku ttɣiman 7 neɣ 10 n wussan i wakken ad d-uɣalen waman yiwen ubrid, d ayen i ten-yeğğan ad d-aɣen tisitirin n waman, ladɣa deg unebdu. Ugur wis sin, d Internet i mazal ur yefri ara. Ma yebɣa yiwen ad yazen neɣ ad d-yawi kra seg Internet, ilaq fell-as ad yerzu alamma d tamdint n Tizi Uzzu. Ay-agi, yebɣa ad d-yini d akken ilaq ad ilḥu 10km, neɣ yezmer lḥal ad isruḥ yiwen wass ɣef liğal n ssaεa. Maca lukan i d-tewwiḍ s ixxamen tili mačči akka. Cetkayen daɣen ɣef uεeṭṭel n uṣiweḍ n lgaz n temdint s ixxamen-nsen, imi ṛwan lḥif ladɣa deg tsemhuyt n tegrest, imi acḥal n tikkal i leḥun d likumiṭer i wakken ad d-awin taqqerԑat n lgaz, uɣur ara sewwen neɣ uɣur ara seḥmun. Bdan yakan lecɣal aseggas d nnefṣ-aya, maca takebbanit yeṭṭfen asenfar-a, teḥbes azal n 6 wagguren-agi. D ayen i ten-yeğğan ad d-gren tiɣri, yerna ad ssutren deg wid teԑna temsalt, gar-asen imeḍberen n tɣiwant Ait Aissa Mimoun, d tenmehla n Imuhal Izuyaz (Direction des Travaux public), i wakken ad yefru wugur-a deg wussan i d-iteddun. Aɣbel wis ukuẓ, d win n yiberdan, imi aṭas n yiberdan yellan deg taddart-agi, ha-ten-in deg yir liḥala, am ubrid ameqqran yeqqnen gar-as d Lekhali, rnu ɣer-s iberdan yellan daxel n taddart. D annect-agi akk n yiɣeblan i yerran tudert n twaculin n taddart n Akaoudj, ttidirent deg lḥif d lmeḥna, ɣef waya ssuturent deg yimḍebren ad d-lhin deg wuguren iceɣben allaɣ-nsen, u ad d-afen tifrat i yiɣeblan s tazzla.
Adaoun Abdel Ghani