D tikkelt tamenzut ideg d-teḍra tannant n usileɣ yecban tagi i lfayda n yiselmaden n yiswiren yemxallafen. D yiwen n rray i teddem taɣlift n usegmi i wakken ad theyyi iselmaden-a ɣer yiwet n temsizzelt ara d-yilin deg 10 duǧember 2016 i d-iteddun. Deg Tubiret, taNmehla n usegmi tessawel-d ass n ssebt iɛeddan i wazal n wagim n yiselmaden yesɛan yakan ugar n semmus n yiseggasen deg umahil-nsen i wakken ad ɛeddin ɣer yiwet n taggayt ɛlayen iwumi qqaren: aselmad agejdan neɣ “Professeur principal”. Ɣef waya, tlata n yiɣerbazen i yemmuggren iselmaden-a: tasnawit n Boucharaine teldi tiwwura-s i wid n tesnawit; Haddouche Said i wid n uswir alemmas, ma d aɣerbaz n Doubaissi yemmugger wid n uswir amenzu. I wakken ad iɛeddi ttiɛad-agi deg tegnatin igerrzen, ulamma akud ur yessefk ara i yimḍebbren n tenmehla i wakken ad ddun akken iwata, d imaswaḍen n uswir amenzu d wid n ulemmas i d-yellan di lmendad i yiselmaden-a i wakken ad asen-ldin akka kra n teḍwiqt ɣer uḥric n tussna deg usegmi d wayen i d-yezzin i uɣerbaz s umata akked wassaɣen i tesɛa leqraya ɣer yiḥricen n tmetti d umecwar n usgam n unelmad. Ɣer ttiɛad-a, sin n yiselmaden n tesdawit n Tubiret i d-yusan i wakken ad d-rnun tamusni-nsen deg uḥric-a, imi d wid yettuxeṣṣen deg-s, i wakken ad snefɛen iselmaden ur neksib ara tirmi ɣezzifen deg unnar. Ulamma s ya ɣer da, aṭas n yiselmaden i d-yettbegginen ilḥir-nsen sdat kra n tɣawsiwin yerzan amahil-nsen neɣ talɣa n temsizzelt i ten-yettraǧun, imaswaḍen d yisdawanen ssuzfen fell-asen aṭas n tegnatin idel wagu, am wakken i aɣ-d-nnant snat n tselmadin: ”s tidet, limer ur neḥḍir ara timlilit n wass-a, ur nettizmir ara ad nissin ayen nugem ɣer yimaswaḍen i d-nemlal. Aṭas n yiḥricen deg useɣri i yeddurin fell-aneɣ, imi di tazwara mačči aṭas aya i nebda nxeddem, daɣ ur aɣ-tessefk ara tegnit ad nelmed deg uḥric-a n “la psychologie” yellan d ajgu deg uselmed.” Iwulem kan ad d-nesmekti dakken timlilit n wass n ssebt-a yezrin, tkemmel ddurt-a i wakken iselmaden ad rren lwelha-nsen ɣer wayen yerzan tarrayt n umahil i lmend n yal tanga. D ayen ara asen-yessisehlen aqabel n temsizzelt deg tazwara, acuɣer ala d allal i useddu n temsirin-nsen daxel n tneɣriyin. Di ddurt wis sin n tannant-a, yettuhegga-d yiwen n wahil anda iselmaden sqerdcen tamsalt n useddu n temsirin d uktazal. Aṭas n yiḥricen-nniḍen iɣef i d-yella umeslay ama d ayen yerzan assaɣ gar uselmad d unelmad, ama d assaɣ gar tangawin irkelli d tzemmart ara ireṣṣu uselmad neɣ d tudert n unelmad deg uɣerbaz. D tagnit i yiselmaden-a i wakken ad snernin tamussni-nsen, mačči kan deg wahil i sɣarayen, maca deg tlufa yerzan amahil-nsen d wassaɣ gar-asen d yinelmaden. Snat n temliliyin-a, ad ssisehlent i yiselmaden aqabel n temsizzelt ara d-yilin ass n 10 deg duǧember i deg-i nella. Ɣef leḥsab n yisallen I aɣ-d-yewwḍen, akayad-a, ad d-yili s tarrayt n yikayaden yecban BAC d win n taggara n uswir alemmas, imi iseqsiyen ttwaheggan-d sɣur tama yettuxeṣṣen deg cɣel-a.
Smail Merzouk