Taddart n la Crête-Rouge deg tɣiwant n Leɛǧiba tger irebbi i yigujilen iwumi i d-thegga yiwet n terzeft s wazal-is ass n ssebt yezrin. Tiddukkla-agi iɣef yella Mourad Drici d aselway, tebda leqdic-is s ujerred n yal agujil neɣ tagujilt yellan deg taddart anda yewweḍ umḍan ɣer 93, iwakken ad asen-d-heggin ayen ara awin. Imi tagnit temmugre-d imensi n Tlalit n Nnbi, tiddukkla n Kafil El Yatim» tessewjed imensi i yigujilen d kra n yinebgawen, terna tefreq kra n yisufar n wučči akked tduli. Ɣef leḥsab n wayen i nwala di yal tarzeft, azal n yisufar yewweḍ ɣer wazal n umelyun deg yal yiwet. Aselway n tiddukkla, Mourad Drici yenna-d «Nekni ass-a nebɣa ad nili di lmendad i yigujilin-a yeḥwaǧen afus n tallelt ladɣa deg tegnatin yecban tid n leɛyudat. Tagi d tamezwarut ara nexdem deg taddart, maca ahil-nneɣ d win ara ikemmlen ɣer zdat, imi anda ilaq ad nbedd ur nɣeffel ara.» Ad d-nesmekti dakken tella-d tmeɣra-a deg yiwet n tegnit igerzen imi tuget n yigujilen yella d igerdan sɛeddan kra n wakud deg tumert d teḍsa imi yiwet n terbaɛt n umezgun tessaweḍ tessettu-asen lḥif ideg ttidiren.
Smail. M