Yella ddurt-a iɛeddan umedyaz Brahimi Lxeyyer deg Uweqqas ilmend n yiwen n usarag s wazal-is ɣef yizamulen n rrqem ɣur Yimaziɣen i yellan d tigemmi turtangawt (Patrimoine immatériel). D asarag i d-thegga Tdukkla Azday Adelsan n Uweqqas, i d-yuɣalen s tegnatin-a n yisaragen yal ddurt, s yiswi n ukemmel deg umennuɣ adelsan s umata. Ladɣa mi ara yili d tira s tutlayt n Lmulud At Mɛemmer. Ugar n tegnit n yisefra, imi inebgi n wass-nni d amedyaz akken i d-nezwer yakan ameslay, yesseɣzef awal Mass Lxeyyer Brahimi ɣef yizamulen n rrqem d umezruy-nsen ɣer Yimaziɣen d lḥala n tgemmi-a ass-a n wussan. D lemɛun, d tabrat i tra tmeṭṭut n tmazɣa ad tessiweḍ i tsutwin deg yiqennucen n yideqqi i yettwaseqdacen ula i tgella. Deffir waya, yella-d uskasi sɣur yimeḥḍar, ama s yisteqsiyen ɣef umezruy d unamek n tidet n yiriten-a n rrqem neɣ d tamawin ɣef usentel-a yakan. Syin akin, yella-d usenzi s ubuddu n yidlisen n umeskar: yiwen ɣef rrqem, yeffeɣ-d deg useggas n 2010 s uzwel n « Yal azamul yesɛa azal », wayeḍ d ammud n yisefra iwumi yefka azwel « Tisit n Udrar n Fad ». Idlisen-a, ffɣen-d s tallelt n Tidukkla Tadelsant Adrar n Fad, yuɣ lḥal.
Mhenni Khalifi