Dduṛt-a, nebɣa ad yili umeslay ɣef ccira n ufunzer (épistaxis) , yettawin ddeqs n medden ar ttbiṭar s lɛeǧǧlan, imi akken yezmer ad yili ufunzer-a xfif, izerri wer ugur, izmer diɣ ad d-yeglu s tlufa timeqqṛanin labeɛda ma yeṭṭuqqet neɣ yedda di lweqt. D tazzla n yidammen seg tanzarin, am ar beṛṛa, neɣ ar daxel (ɣer yimi neɣ s agerjum). Yettban-d aṭas di tallit n teṣmuḍi ɣer wid yesɛan gar 20 d 49 n yiseggasen. Yezmer ad yili xfif, izerri wer ugur. Yezmer diɣ ad yili d ssebba n ddeqs n wuguren imi yettawi-d tikkwal tamettant n umdan.
D acu i d-yettakken afuzer?
Ssebba-s mucaɛen gar madden, d tacriḥt yellan gar tanzarin, yettazzalen d idim mkul mi ara tt-yennal ufus neɣ mi ara yili lḥamu.Maca llant ddeqs n ssebbat nniḍen ara d-nebder: taṛuzi n yeɣsan n tanzarin umbeɛd amennuɣ neɣ uɣelluy, axenzir neɣ tamsalmit yettḥazen tinzert akk waṭṭan ubeḥri ma yedda di lweqt. Ddeqs n waṭṭanen n yidammen zemren ad d-fekken afunzer, aneggaru-a yeṭṭuqqut, yettuɣal-d acḥal n tikkal d ayen i yettawin amejjay ad inadi ɣef ssebba deg yidammen n umdan. Ula d tallit n tarda ɣer tlemẓit, aṭṭan n sskeṛ d lehlak n turin zemren ad d-glun s ccira-a.
Amek ara neɛqel afunzer iweɛṛen?
Afunzer iweɛṛen d win yeṭṭuqten, yettazallen s waṭas si tanzarin i snat, yettiɣzif ddeqs di lweqt. Ula d amdan tettbeddil liḥala-s, imi yettiwriɣ, yettergigi, yettemlelli tikkwal ikeččem di lkuma ma iɛeṭṭel afunzer-a wer ma yettusejji di lweqt.
Acu ilaqen ad t-yexdem umdan zdat n ufunzer?
Di tazwara, ur ilaq ara amdan ad yettqelleq, ula d win yellan ɣur-s ilaq ad as-yekkes aɣilif. Akken diɣ, yesfk fell-as ad yeqqim ɣef tqeṣrit-is, ma ur yeṣṣaweḍ ara, yezmer ad yeẓẓel cwiṭ kan iman-is akken ad as-yekkes facul. Syin , ad yeddem sin iḍuḍan imezwura, ad ten-isers s uẓeyyeṛ ɣef tiwwura n tanzarin-is azal n 10 n dqayeq. Yezmer ad iɛawed aya i tikkelt nniḍen, imi ma d tacriḥt-nni i ɣef id-nemmslay yakkan i d ssebba , izerri ufunzer imiren. Ma iwala umdan dakken tazzla n yidammen tettkemmil ilaq-as ad yerzu s lɛeǧǧlan ɣer ttbiṭar, u ad yerr tameččimt n leqṭen azeddgan deg tinzert yettazzalen d idammen neɣ i snat imi din i llan ttawilat ifazen akken ad yettusejji ufunzer, syin ad yili unadi s telqay ɣef ssebba-s.
Salima dali