Ass-nni n ssebt iεeddan i yebda leqdic adelsan i d-yettwaheggan i lmend n yimuras n tegrest iɣurbizen, ama deg Uxxam n Yidles Mulud At Mεemmer n Tizi Uzzu, ama deg umaruz-is n Azazga.
Ttiεad-agi, yella-d gar 24 alamma d 28 deg duğamber 2016. D tagnit ideg ara faṛsen yilmeẓyen imuras-nsen n ccetwa. Ma gar wid i d-isuddsen leqdic-agi adelsan, ad d-nebder: Taneɣlaft n Yidles, Tanmehla n Yidles, Axxam n Yidles Mulud At Mεemmer n temdint n Tizi Uzzu, d umaruz-is yellan deg Azazga. Ma d ahil yettwajerden sɣur yimsuddsen-agi, d anesbaɣur, imi ttilin-d aṭas n leqdicat deg n Uxxam n Yidles, gar-asen: 4 n yisikwan (unuɣ, taklut, n tira n tifinaɣ, tin n tugniwin), asenεet n yiwen n usaru i wrrac, imseḍsi d useḥḥar…atg. Ma deg umaruz n Uxxam n Yidles Mulud At Mεemmer n Azazga, ttilin-d waṭas n leqdicat-nniḍen gar-asen 4 n yisikwan (imuhal n ufus, tira, sbiɣa, unuɣ), taɣuri n tmacahut i wrrac, imseḍsi d useḥḥar…atg.Bɣan imsuddsen n leqdic-agi, ad sεeddin yinelmaden imuras-nsen deg tegnatin yelhan, gar usgunfu d temlilit n wayen akk ḥemmlen.
Abdelghani Adaoun