Ulamma tamnaḍt-agi n Ait Aissa Mimoun tettwassen s lɣella n zzit n uzemmur, maca deg yiseggasen-agi iεeddan ur tessefraḥ ara tarewt n uzemmur d wayen i d-yettak n zzit i imezdaɣ n tama-a. Llan wid i d-yeẓdan yakkan azemmur-nsen, llan wid mazal ttelqaḍen. Dɣa deg useggas-agi, la nettwali lɣella n zzit uzemmur txus s waṭas, d ayen iɣef ssḥasfen yifellaḥen n temnaḍt-a n Ait Aissa Mimoun. D ayen ara yeğğen tuget deg-sen ad tt-id-ağğwen s tmara. Sseba n lexsas-agi n zzit d lexsas n usafar n uzemmur aseggas-agi daɣen. Yerna aṭas n lğihat ideg i d-iban lexsas n lɣella-a, llant tzemmrin ur d-ngir ara ula d aεeqqa. Ulamma deg useggas yezrin txus zzit n uzemmur, maca mačči am useggas-agi. Yerna akken tenza ilindi zzit n uzemmur dagi deg Ait Aissa Mimoun i tenza ula aseggas-agi imi s 800 DA i litra. Ulamma aṭas n yimezdaɣ i d-yennan yezmer lḥal aseggas-agi ad tenz s 850 DA neɣ ahat s 900 DA, maca teqqim akken tella. Aṭas n ssebbat i d-yeglan s lexsas n lɣella n zzit uzemmur, gar-asent, aṭas n yimezdaɣ ur xeddmen ara azemmur-nsen (ur neqcen, ur fersen ama deg lqaεa ama di cciṭa), ssebba daɣen n yideflawen i d yewten deg yiseggasen iεeddan…atg. Yerna ula d azemmur ur yeεdil ara, imi llan wid iwumi i d-itekkes gar 12 litrat ar 15 n litrat deg uqenṭar n uzemmur, llan wid iwumi i d-yekkes alamma d 22 n litrat n zzit i uqenṭar. Daymi llan wid yettwalin belli aseggas-agi, azemmur, ixus zzit, llan wiyaḍ qqaren, ala am yiseggasen iεeddan.
Ar ass-a, mazal ugur n Internet
Taɣiwant n Ait Aissa Mimoun i d-yezgan deg ugafa n lwilaya n Tizi uzzu, i ibeԑden fell-as azal n 15 km, taɣiwant ideg llant 23 n tudrin, tettwassen s waṭas n yinaẓuren yecban Ali Ferhati, Mohamed Rahim, Belkhir Mohend Aki d wiyaḍ-nniḍen. Taɣiwant-a, mazal tettidir iseggasen-agi ineggura lexsas d ameqqran deg yiḥricen d yisenfaren yemgarden n tudert tatrat gar-asen Internet. Tuddar-is, nḥafent aṭas imi ar ass-a n wussan mazal ugur n usekcem n ttawil atrar n Internet ɣer yixxamen n yimezdaɣ-is. D amedya, ma yebɣa yiwen ad yazen neɣ ad d-yawi kra seg uẓeṭṭa n tissist akken i d as-qqaren, ilaq fell-as ad yerzu alamma d tamdint n Tizi uzzu. Ayagi, yebɣa ad d-yini d akken ilaq ad ilḥu 15 km, neɣ yezmer lḥal ad isruḥ yiwen wass, ɣef liğal n ssaεa. Neɣ ad yerzu ɣer Lebḍaḥii i wakken ad yexdem ccɣel-is. Maca lukan i d-tewwiḍ s ixxamen, tili mačči akka. I lukan ad tt-yeḥwiğ yiwen deg yiḍ, amek ara yexdem? D ayen i ten-yeğğan akk ad d-aɣen ayen iwumi qqaren “Les Modems”, neɣ s tilifun-nsen kan. D ayen i ten-yeğğan, diɣ, ad d-gren tiɣri yerna ad sutren deg wid teԑna temsalt gar-asen imeḍbbren n tɣiwant Ait Aissa Mimoun. Ar melmi ara tdum akka, taɣiwant n Ait Aissa Mimoun, ad teqqim mebla ttawil n Internet?
Adaoun Abdelghani.