Agraw n Tdukliwin Tidelsanin n taddart n Yiɣil Naser i iteddun ɣer tɣiwant n Yiɣram, tama n Uqbu, yexdem yiwet n tirza ɣer sbiter n Uqbu i lmend n usfugel n wass amenzu n yennayer 2017, anda skecmen iɛeggalen n tdukliwin-agi lferḥ ɣer wulawen n yimuḍan i yellan dinna ass-nni n lexmis. Wwin yid-sen imensi n yennayer, seksu s ubiṣar, i asen-d-heggan i lmend n waya, wwin-asen-t i yimuḍan ɣer sbiṭar. Am wakken i asen-ferqen arrazen. D tagnit anda, diɣ, sferḥen arrac ur nesfugel yennayer deg yixxamen-nsen akked twacullin-nsen. S wakka, leqdic am wa i gant tdukliyin n taddart n Yiɣil Naser, ad yuɣal usfugel n yennayer d ass n tegmat, tdukli d leḥnana gar yimeẓdaɣ n yal tama n tmurt.
B. Benhamouche