Send ad tili taddart n Tmaɣuct, tuɣ llant kra n twaculin, mfarzaɛent, yal yiwet tettidir weḥd-s. Zedɣen di Tɣerfet, zedɣen di Tala Bezru…Ma d Sidi Salem-U-Mexluf, yusa-d si Terga Zeggaɣen deg unẓul n Lmaruk. Tamurt, tettak-it i tayeḍ alammi d-yewweḍ ɣer Umecras deg tmurt Leqbayel. Yella ikess i yiwen uxxam, nutni ur faqen ara yis-s. Ass-nni, issefqed bab lmal, yufa-t yeṭṭes, tisekrin la as-ttanint, uccanen la as-d-ttaran lmal. Yuɣal-d s axxam, inna-asent i tlawin: ‘’yyamt, ad tfetlemt seksu, wagi ara i aɣ-ikessen mačči d ameksa. Mmugrent-t ɣer tewwurt s teɣratin. Yenna-asent acu-t akka ? Acu-t akka yeḍran ? Nutenti, qqarent-as kan: ‘’cuffaɛa a Ccix’’ ! Cuffaɛa a Ccix’’! Inṭaq, yenna-asen: ‘’tura ad awen-d-iniɣ: Lukan ad i yi-teṣrem, yili ad awen-ṣṣerwiɣ lmal, imi akka, bqa laxir’’. Iṭṭerḍeq ɣer Tmaɣuct, yiwet n taddart deg At Dwala. Iwweḍ, yufa tama n yiwet n tḥeccaḍt tasedda, indeh fell-as tekker. Yelḥa ɣer sdat, d izem, indeh fell-as ikker. inna-asen: ‘’d ayen, dagi ara nezdaɣ’’. Syin, isgerw-d tiwaculin-nni imferzaɛen, yenna-asen: ‘’a yatmaten! i wakken ad yeddukel ṛṛay-nwen, ad yiǧhid yiɣil-nwen, yessefk ad tesbeddem taddart di tama-a’’. Qqaren-d, ulin-d si Tala n Uzru, ulin-d si Tɣerfet, bdan a ferrsen, sbeddayen ixxamen di tama-nni i asen-d-inna. Akken akk agur n ɣuct, yella d lxedma alammi tbedd taddart n Tmaɣuct . Akka, qqaren yimezwura:” Ur d-sbedden tudrin alammi ǧǧan tineswin”.
Ramdane Lasheb