Ad d-theggi tneɣlaft n usegmi, nettat akked n tmawin teɛna temsalt, ladɣa imaswaḍen, yiwen wahil i uselmed n temsirin ur lmiden ara yinelmaden imi ɣelqen yiɣerbazen deg waṭas n yimekwan ɣef sebba n yir lḥal i d-yellan taggara-a deg tmurt. Aṭas n yiberdan i yeḥbes udfel neɣ ugeffur.
Ɣef waya, ḥebsen yiɣerbazen ɣef leqraya. Ma nefka-d kan amedya, ad naf deg tmurt n leqbayel, amur ameqqran n yiɣerbazen i yellan deg tudrin i d-yezgan deg udrar, xelqen azal n smana. Xas ma inelmaden qerben ɣer uɣerbaz, meɛna qessiḥet teswiɛt, ur zmiren ara ad ruḥen, ladɣa, arrac imecṭaḥ. ula d iselmaden-nsen, llan wid i d-yettasen s lembɛid, ur zmiren ara ad ɛeddin. Ihi, ɣef wanect-a akk ara d-tessewjeḍ tneɣlaft n ttrebga yiwen wahil i temsirin ur nettwaselmed ara. ‘’Nemsefham, nekni akked yimaswaḍen i wakken ad nessewjed yiwen wahil n temsirin ur netwaselmed ara, yakan, imi ɣelqen yiɣerbazen. Ad yili wahil-agi di lmendad n yiselmaden, ad t-xedmen deg wussan i d-iteddun i wakken ad kksen leɛḍil i d-yellan deg smana-agi iɛeddan. Xas ulamma, leɛḍil yemxalaf gar uɣerbaz d wayeḍ, acu kan, yal aselmad ad iwali amek ara yexdem’’. Akka i d-tenna Massa Benghebrit. Ma ɣef wuswir n uselmed deg yiɣerbazen, terna, tenna-d :’’ad nexdem taslaḍt deg yal aɣerbaz i wakken ad nwali ma yettili-d unerni n uswir seg useggas ɣer wayeḍ’’. Ma ɣef temliliyin akked sindicat, ad tezwir s wid yellan, yakan, d iqdimen, syin ad temlit akked wiyaḍ, ɣef wakken i d-tenna.
H. M.