Taḥanut d yiwet gar 23 n tuddar n tɣiwant n Ait Aissa Mimoun, i d- yezgan deg ugafa n tɣiwant-agi u deg ugafa n lwilaya n Tizi Uzzu, tebԑed ɣef usqamu aɣerfan aɣiwan yellan deg Lebḍaḥi s wazal n 10 km. Taddart-agi, tettidir iseggasen-agi ineggura lexsas d ameqqran, deg yiḥricen d yisenfaren yemgarden n tudert tatrart gar-asen: ttawil n Internet, lgaz n temdint, yir liḥala n yiberdan, asezdeg n tawennaḍt, imḍiqen i yilmeẓyen, d uɣbel n waman tissit…atg, tura yerna ula d win n yiḍuman. Seg wasmi i d-yewwet udfel, ur d-εeddan ara ikamyunen-nni yettawin iḍuman. Azal n 15 n wussan-agi, iḍuman-nni i d-suffɣen yimezdaɣ n taddart-agi, mazal-iten deg tewwurt n taddart, s daxel n yicelwiḍen iberkanen. D ayen i d-yeglan s rriḥa d iqejan yesḍen, ladɣa deg yiḍ. Imezdaɣ n taddart-agi n Tḥanut, ssuturen deg yimḍebbren teεna temsalt, ladɣa aselway n Usqamu aɣerfan n Ait Aissa Mimoun, iɣef yella mass Aki Chabane ɣef uqerruy-is. i wakken ad uɣalen s tazzla yikamyunen yettawin iḍuman-agi, d tiwin n yisnedyaq-nniḍen ijdiden n yiḍuman, imi iqdimen-nni gezmen akk, uɣalen ur slihen ara.
A. A