Imezdaɣ n 23 n tuddar n tɣiwant n Ait Aissa Mimoun, la ttrağğun s ccuq melmi ara d-yili ufraq n yixxamen, ama d wid n tallelt (70 melyun), ama d ixxamen imettiyen. Membeεd mi i d asen-d-ttunefken wazal n 120 n yixxamen n lemεawna d wazal n 12 n yixxamen imettiyen, i lfayda n yimezdaɣ n tɣiwant-agi, seg tazwara n useggas-agi n 2017. Ulamma imezdaɣ llan wid yettrağğun tisura n yixxamen-nsen yellan deg Tamda, llan wid yettrağğun idrimen-nni n 70 melyun, maca asqamu aɣerfan aɣiwan (APC) n tɣiwant-agi n Ait Aissa Mimoun, yessutur deg wid teεna temsalt i wakken ad asen-d rnun ixxamen imettiyen d yidrimen-nniḍen. D ayen iɣef i d-yuɣal uselway n tɣiwant, Mass Akli Chabane : ‘’ d tidet nugi ad nefraq ixxamen-agi, acku d awezɣi ad nessefreḥ akk imezdaɣ-nneɣ. D amedya, nesεa azal n 1400 n zzmamat n ujerred n yixxamen n sebεin melyun, nekni fkan-aɣ-d kan idrimen i wazal n 120 n yixxamen, ruḥ tura kečč freq-iten. Nekni si tama-nneɣ, nger tiɣri ama i lwali n Tizi Uzzu, ama i Tneɣlaft n lebni d temdint, i wakken ad aɣ-d-rnun ixxamen neɣ ad aɣ-d-afen ttawil iwulen’’.
Timliliyin n ddabex i uɛiwen n tmuḍint Souhila
Tiddukkla n waddal n taddart n Uqawej s tallelt n Usqamu aɣerfan aɣiwan n Ait Aissa Mimoun, suddsen-d aṭas n temliliyin n ddabex uḍar. Bdant ass-nni n sem 27 seg yennayer 2017, ma d timlilit n taggara ad d-tili ass n 8 meɣres 2017. Timeliliyin-agi, ttilint-d deg unnar aɣiwan n tɣiwant n Ait Aissa Mimoun, yellan deg “Tiplakin” tama n tesnawit n “Med Oudiai”. Ad d-nesmekti belli timliliyin-a, ttilint-d i wakken ad εiwnen s yidrimen-nni ara d-jemεen, yiwet n teqcict tamuḍint n taddart n Uqawej, tagi d tamsiwt “Sellah Souhila”. Am wakken diɣen ara d-tili tmeɣra n ccna sɣur waṭas n yinaẓuren n tama-agi n Wagennun, yecban Karim Khelfaoui, Mouh Oublaid, Ali Ferhati…atg. Ad d-yili wannet-agi ass n 8 deg meɣres 2017 deg umraḥ n usqamu aɣerfan aɣiwan yellan deg “Levdhahi”, dima i wakken ad siwḍen ad d-jemεen ugar n yidrimen i tmuḍint-agi.
Adaoun Abdelghani