Ilindi tallit-agi i d-ilul i tikelt tamezwarut udlis s wunuɣen s teqbaylit, (La bande dessinée) sɣur Kamel BENTAḤA. Azwel-ines ƐEẒẒI d ƐEZZUL, d yiwen udlis i d-yerran ṣṣut deg waṭas n yimukan, aṭas igerdan iumi yeɛǧeb, akken daɣen i yeɛǧeb ula i yiselmaden n tutlayt n teqbaylit. Ass-a, yuɣal-d Kamel Bentaha s udlis amaynut i umi yefka azwel «Aqejmamar» neɣ amecḥaḥ akken i as-qqaren di kra n tamiwin. Deg-s, yesnerna tamuli-s deg unuɣen akken ad jebden ugar allen n yigerdan. Ula d taqbaylit swayes yura tgerrez, tjebbed ɣer teqbaylit-nni n yimezwura. Tamacahut n tikelt-agi, tettwassen di kra n yimukan. Yeddem-d umyaru agzul deg-s, icebbeḥ-itt s wunuɣen. Tewwi-d tmacahut ɣef yiwen umɣar d amecḥaḥ i yebɣan ad yessefreḥ tameṭṭut-is, ɣerr taggara infeq-as-d iɣes. Sakin, nnuɣen dɣa truḥ temɣart, twureb s axxam-nsen. Syin, yettnadi Aqejmamar winna ara as-tt-id-yerren. Ɣer tagrara, d azrem ara as-tt-id-yerren. Ilul Kamel Bentaha ass, 15 deg tuber 1968, yessufeɣ-d ammud-ines n yifɣal amezwaru deg usegga 2013 azwel-ines «Amicalement vôtre». D ammud i as-yefkan tagnit ad yekcem s wudem unṣib deg umaḍal n udlis n wunuɣen. Ur iɛeṭṭel ara yessufeɣ-d sin n yidlisen s wunuɣen ( bandes dessinées ) s tutlayt n Taɛrabt, i as-d-ssutrent snat n tenmahliwin, Tanmehla n yilmeẓyen d waddal akked Tenmehla tazzayrit n waman. D sin yidlisen-agi n wunuɣen i yettwellihen ɣer useḥbiber n ugama akked waman. Yuɣ-d aẓar di taddart n CERFA N BAHLUL, taɣiwant n Iɛeẓẓugen. Yebda amecwar-is s yisem-is d amsefɣul deg uɣmis n «Le Pays» i d-iteffɣen yal imalas, d aɣmis amenzu i yeskecmen imagraden n tutlayt n tmaziɣt deg yijga n yisebtaren-is. Tiɛubbja-ines deg usuneɣ, tdegger-it ad yaẓẓ ɣer sdat ugar, armi i d-yewwi amkan-is s wunuɣen-ines deg uɣmis «Les nouvelles confidences» akked di tesɣunt n yigerdan «Nounou». Asirem-is meqqar, iswi-s yenǧer, yewwi abrid-is yekcem i lebda s telqayt deg uḥric-agi n yidlisen n wunuɣen. Deg useggas n 2015, isewjed-d yiwen n udlis n wunuɣen s tutlayt n teqbaylit azwel-ines «Ɛeẓẓi akked Ɛezzul», d adlis i d-yewwin arraz amezwaru di temsizelt n FIBDA (Festival International de la Bande Dessinée d’Alger) n useggas n 2016 di Lzzayer. Ass-a, Kamal, yebɣa ad d-yefk akk tamussni-ines akked tiɛubja-s i tutlayt n teqbaylit, akken ad as-yernu cbaḥa s wunuɣen-ines i d-yettmeslayen s teqbaylit i warrac d yinelmaden yeqqaren. D ttawil fsusen, ara ten-ideggren akken ad ḥemmlen ad ɣren s tutlayt n teqbaylit.
F. M.