Sidi Lḥaǧ Saɛdi, yusa-d netta d gma-s Mḥend Saɛdi si Terga Zeggaɣen deg unẓul n Lmerruk ar taggara n lqern seṭṭac. Tamurt tettak-iten i tayeḍ alammi d-wwḍen ɣer Delles, syin kemmlen ɣer Mizrana. Mḥend Saɛdi, iqqim iṭneṣṣel din di Mizrana, ma Lḥaǧ Saɛdi ikemmel abrid-is, iwweḍ alammi d taddart n Tala xlil deg At Dwala. Isbedd axxam deg udrum n At Turtit. Imiren, At Fayed d Wat Turtit llan ttnaɣen, ur mtawan ara, yal wa i yiman-is, Taḥeccaḍt di tlemmast n taddart, tuɣal d talast gar-asen. Yiwet n tikkelt, iɣli-d lehlak n ttarka ɣef udrum n At Fayed alammi iruḥ ad inger. Sekkṛent tewwura, gten lmeytin, mi ɣzan i yiwen, ad uɣalen ɣer wayeḍ akken azal n ddurt. Akken ad ḥerzen ɣef terwiḥin-nsen, kra ffɣen ixxamen-nsen, ruḥen rewlen ɣer lexla, zedɣen deg yitemma, wiyaḍ guǧǧan ɣer wanda-nniḍen, ǧǧan taddart. Sidi Lḥaǧ Saɛdi, iwweḍ ɣer Tḥeccaḍt, ɣer tlemmast n taddart, anda tella talast gar udrum n At Fayed d Wat Turtit, irfed taεekkazt-is s igenni, iwwet-itt s lǧehd, irṣa-tt di tmurt, syin yenna-as: “Wellah! Ar ttarka, ad teḥbes da. U sya d asawen fkiɣ aqeṛṛu-iw fell-asen”. Kra n wussan, tterka teḥbes, At Turtit ur ten-tḥuza ara, menɛen. Ma d Sidi Lḥaǧ Saɛdi, yerna snat n ledwar dɣa immut. Almend n usmekti n wass-nni, imezdaɣ rṣan tlata n yizra n tnicca deg wadeg-nni deg irṣa Sidi Lḥaǧ Saɛdi taɛekkazt-is.
Ramdane Lasheb