Seg umenzu deg yennayer 2017 armi d 14 deg furar-a ideg nella, tjerred Tmehla n Uḥuddu aɣerman (Protection Civile) n waɣir n Bgayet, azal n 3347 n tuffɣiwin i kra n wayen i d-yellan. Deg-sent ttwasiwḍen ɣer yimeḍqan n tujjya 263 n wid i tent-yuɣen, llan-d daɣen lqidar n 1730 d imuḍan. Akkin deg ubrid n tikli, ttwajerrḍen 147 n yisehwa, i d-yesseggran 156 n yimejraḥ, glan s 4 n terwiḥin. Ma seg tama n yindaren n tmes, llan-d s ujemmal 94 seg-sen, gar-asen wid yekkren deg temdint, s umḍan n 16, d wid n umkan n uxeddim s lqidar n 4. Ugar n waya, llant-d 854 n tmehlin-nniḍen yemgaraden, am usellek n wid ur nesɛi tadarit akked yimdanen imeqqranen di leɛmer. D awal ula ɣef liḥala n tegnawt imalasen iɛeddan, ideg i d-gren iman-nsen aṭas n tikkal yirgazen n usellek, akken ad sisehlen ladɣa tikli n yiḥamulen n waman deg yizenqan. Yelha ad d-nerr awellih belli segmi d-tekcem tegrest, txeddem Tmehla n Uḥuddu Aɣerman yiwet n tedwit i uḥesses n medden ɣef umihi (danger) n umunuksid n ukarbun, neɣ amenɣaw asusam, akken i as-ssawalen.
M. K.