Ddurt iɛeddan, yerza lwali n Tizi-uzzu ɣer wasun n uẓeffun anda yessefqed isenfaṛen i yettusbedden di tɣiwanin n wassun. Yebda tirza-s si tɣiwant n Tefrit n At Lḥaǧ , anda ibedd ɣer usenfaṛ n lebni n uɣerbaz alemmas B5 deg ulmus n tɣiwant anda lecɣal deg-s sɛan aṭṭas n laɛḍil, d ayen i yerran lwali, ad yefk iwellihen i yemḍebbṛen n tɣiwant d wid teɛna temsalt, i wakken ad ɣiwlen deg uheggi n uɣerbaz –agi i unukcum aɣurbiz i d-itteddun. Am wakken, diɣen, i yerza ɣer temɛemmeṛt n Tefrit n At Lḥaǧ anda yemmeslay d wid isedduyen aselmed deg-s. Tinna, wwin-d awal ɣef uselmed n ddin n lejdud akken ur d-ttafen ara abrid wid i d-yettawin tiktiwin n lbaṛṛani ur nelli ara d ayla n tmurt . Ayen i d-yejjebden lwelha n lwali di tamɛemmert–agi, d allalen i sxedem iserdasen (lɛeskeṛ) imaziɣen di tṛadat-nsen am yimrigen (leslaḥ) d wayen i yettḥaraben fell-asen . Si tɣiwant n Tefrit n At Lḥaǧ , udren-d ɣer tɣiwant n Uẓeffun. Di tazwara, ibedd ɣer yisenfaṛen n yiɣerbazen imaynuten i yessefk ad ldin deg tazwara n cutember i d-iteddun, aseggas aɣurbiz 2017/ 2018, aɣerbaz amenzu , aɣerbaz alemmas B7 akked tesnawit. Ibeggen-d yimḍebber amezwaru n lwilaya lɣiḍ-is, imi axeddim deg iɣerbazen –agi ur yeddi ara akken i iwata : sɛan aṭṭas n laɛḍil, ama di lebni neɣ deg uheggi n yibṛaḥen d yiberdan i yettawin ɣur-sen, ladɣa imi i yezṛa iɣerbazen i yetteddun tura anda ṭuqten yinelmaden. Amedya, aɣerbaz amenzu Saɛdu Ɛli deg wayeg lemden igerdan d tgerdatin. Akka tura isegrew ugar n 900 n yinelmaden . D ayen i yerran lwali, ad iwekked ɣef uɣiwel akken ad ttuheggin i unekcum aɣurbiz i d-iteddun . Syin , iruḥ ɣer teɣremt n 353 n tmezduɣin i ifuken s lebni di 2014, ar ass-a, ur ttufarqent ara. Xas akken azal n 218 n yixxamen di teɣremt-agi, banen-d yimawlan-nsent di maɣres 2015, maca tisura ur sent-ttufkent ara ar tura. Ssebba n waya, d trisit, aman d lgaz ur ttusekcman ara. Rnu ugur n yiberdan d wayen iteddun . D ayen i yerran imḍebber amezwaru n lwilaya n Tizi Uzzu ad yessali ṣṣut-is ɣef wid i yellan d sebba n ustehzi-agi, imi asirem n yal tawacult tazzayrit d akken ad tt-id-tṣiḥ tmezduɣt. Syin, yewwi lwali abrid ɣer yiwen n yiɣzeṛ i yellan di tlemmast n temdint n Uẓeffun, imi lecɣɣal n uqaɛɛed n yiɣzer–agi s leswaṛ n ubiṭun, mazal ur fukken ara, tin ɣer-s d abrid ara yeddun s teɣzi n yiɣzer-agi akken ad tifsus tikli deg ubrid aqdim, d ayen i t-yerran ad iṣaḥres ɣef wid ibedden ɣer usenfar-agi. Deg lport n uẓeffun anda i yemlal d inegmaren d wid t- isedduyen, yesla i yiɣeblan i ten –yerzan , am wakken i ibedd di luzin n teflukin SAKOMAS. Seg tɣiwant n Uẓeffun, yewwi abrid ɣer tɣiwant n At Cafaɛ , dinna, ibedd ɣer uɣerbaz alemmas amaynut ara yeldin tiwwura-s deg useggas aɣurbiz i d-iiteddun, yefṛaḥ imi yufa lecɣal deg-s tteddun akken ilaq . Syin yerza ɣer teftist (plage) iwumi qqaren ( Petit paradis), ula dinna, ibeggen-d lɣiḍ-is seg wayen iwala, am yiḍumman i yettuḍegren deg-s. Syin ,yetti-d ɣer teftist n Sidi Xlifa , imi deg-s ittuhegga-d yiwen n usenfar n tmarrit d tuksa n lxiq . Seg tɣiwant n At Cafaɛ , d abrid ɣer tɣiwant n Aɣrib anda i ibedd ɣer yiwen n usenfaṛ n lebni n lluzin n lajuṛ deg umkan iwumi qqaren Agni Ucarqi , anda lecɣal bdan deg-s , yerna d asenfar ara yefken axeddim i waṭas n yilmeẓyen d telmezyin n temnaḍt–agi, d asenfaṛ ara d-yeglun s lfayda i yimezdaɣ . Am wakken i ibedd ɣer teɣremt n 500 n tmezduɣin AADL d teɣremt 340 n tmezduɣin i lekra. D taɣiwant i yesferḥen lwali n Tizi Uzzu di taggara n tirza-s
Kader Belaid