Ass-nni n lexmis yezrin ɣef 13h i telli s wudem unsib rreḥba tis-20 n uzemmur i d-tettheggi yal aseggas Tidukkla n yifellaḥen i tneflit d usnerni n lɣella n uzemmur s lemɛawna n tenmehla n tfellaḥet n lwilaya n Bgayet di temdint n Uqbu.
Tekka tfaska-agi 3 n wussan di 23 di furar almi d ass-nni lǧemɛa iɛeddan, nnig n 7O n yifellaḥen i yekkin deg-s. Ma yella deg wahil, ad naf ass-nni amenzu, tella-d tulya n temsikent n lɣellat yemxalafen akka am n zzit d leṣnaf-is : zzit n lḥuḍ, zzit ucemlal , zzit uzarraj, azemmur aquran ameṭṭur, imecellaḥ…atg. Am wakken daɣen i d-ttwasnaɛtent lɣella-t-nniḍen akka am tazart n At Imɛuc , d tament i d-wwin yimrebbiyen n tzizwa ɣer tama n temsikent-agi. Ayen i d-jebden lwelha n yimzuyar d timsirin n uleqqem i d-yefka Mass Mexmuxen Arezki deg yiwet n tzeqqa , anda i d-yesselmed aṭas n medden ɣef wamek i tettili lleqma n uzebbuj i wakken ad yuɣal d azemmur, d wamek ilaq ad yili ufras n tzemrin . Ma yella deg wass wis sin, llan-d kra n yisaragen i d-fkan kra n yisdawaniyen ɣef lehlakat yettaṭafen tizemrin d uɛeqqa, fkan kra n naṣayeḥ i yifellaḥen. Ma yella deg wass aneggaru, yella-d usenɛet n yiwen n usaru yexdem Mass Maxmuxen Arezki ɣef wamek ilaq ad yili uleqqem n uzemmur. Tekfa rreḥba n uzemmur s kra n ttewsayat i d-fkan kra n yijenyuren n tfellaḥet i useḥbiber ɣef lɣella n uzemmur imi tesɛa azal meqqren deg usnerni n tdamsa n temnaḍt n summam s umata.
B. Benhamouche