I lmend n wass agraɣlan n tmeṭṭut, i d-yettilin yal aseggas ass n 08 deg meɣres, tawacult n yidles n lwilaya n Tizi Uzzu, tsuddes-d leqdic adelsan s wazal-is. D armud yeddan ɣef teɣzi n 4 wuassan, imi yebda ass-nni n lḥed 05 deg meɣres, yekfa ass-nni n lexmis 09 deg waggur-agi ideg nella. Γef teɣzi n ukkuẓ n wussan-a, lland waṭas n yirmad yecban timsikniyin (tiqnedyar, talaɣt, lḥelwa, iẓeḍwa n taḍuṭ…) timsikniyin n usuneɣ d tid n yidlisen, yella-d diɣ usenzi s ubuddu sɣur kra n yimura. Ma d ayen yerzan ahil yettwaxedmen, yella-d akka : ass n 7 deg meɣres, deg uxxam n yidles Mulud Mɛemmri tella-d tɣuri n yisefra d yicewwiqen n tlawin, yella-d diɣ usenɛet n usaru-nni «Tutlayt n Zahra». Ma deg tzeqqa-nni «Axxam-nneɣ» n uxxam n yidles, tella-d rreḥba n tlawin akked tiddukkla tadelsant Faṭma n Sumer n Illula Umalu. Ma deg Umaruz n uxxam n yidles n Azazga, tella-d tɣuri n yisefra d tajmilt i tmeṭṭut, yella-d diɣ uskan n usaru-nni «Le vent des Aurès». Ma deg temkerḍit taqejdant n tɣuri taɣerfant, tella-d yiwet n temlilit neɣ d asikew n tira n tlawin sɣur Ben Mouhoub Djouher, Naima Si Mohand, Kenza Djurdjura, Zoulikha Touati, Ouarda Cherifi. Ass n 8 di meɣres, deg uxxam n Yidles n Tizi Uzzu, tella-d yiwet n temlilit ɣef tẓuri n tmeṭṭut. Tella-d diɣ yiwet n tmeɣra n ccna, ideg iɣenna Mourad Guerbas, Siham Stiti, Khaled Par hasard. Ma deg umaruz n Azazga yecna Guerbas, Rachid Hemmouche, Said Mhelmi d wiyaḍ. Deg tzeqqa n ssinima n Tizi Uzzu, yella-d usenɛet n usaru «Lalla Faḍma n Sumer» n Belkacem Hedjadj, am wakken daɣen i d-tella turart n yiwet n tceqquft n umezgun sɣur tarbaɛt «Fertuna». Ma d ass-nni n lexmis 09 deg waggur-agi ideg nella, tella-d tmeɣra n taggara deg uxxam n umezgun Kateb Yacine n Tizi Uzzu, d tajmilt i tlawin-agi : Nna Faḍma, Touati Zoulikha, Nna Ouardia Cherrak, Nna Tassadit d Farida Gueroub.
Ghani Amazigh