Azekka-nni tanezzayt ilemẓi-nni ikker izwar ɣer umekkan-nni, ikcem deg uruz n useklu iffer. A tt-an tewweḍ yemma-s d tamezwarut tenna-as : ay aɛessas n umekkan-agi hdu-d mmi ad iyi-yefk i ɛemmi-s ad iliɣ d tameṭṭut-is. Netta iffer sdaxel n wuruz yenna-as-id : ṛuḥ, meqbuleḍ. Tuɣal-d yemma-s-nni s axxam teḥka-asen, ayen i aɣ-d-inna mmi iḍelli d tidet. Wwḍeɣ ɣer din ufiɣ aseklu-nni isɛa uruz, ayen i s-sutreɣ inna-yi-d meqbuleḍ. Azekka-nni daɣen truḥ weltma-s, tewweḍ tenna-as : Ay aɛessas umekkan-agi hdu-d gma ad iyi-yefk i ucrik-nneɣ. Netta iffer daxel n wuruz, yerra-as-id : ṛuḥ meqbuleḍ. Slazekka-nni d nuba n tmeṭṭut-is tewweḍ ɣer din-a tenna-as : Ay aɛessas n umekkan-agi efk-as laɛma u lekḥel i urgaz-iw akken ad xedmeɣ ayen i yi-ihwan. Am yimezwura yerra-as-id : ṛuḥ meqbuleḍ ! Kra n wussan yuɣal s axxam tenna-as yemma-s : anda i truḥeḍ a mmi ?
-ruḥeɣ rziɣ s ameddakkel-iw ihelken, zureɣ-t-id.
-ayen i tenniḍ a mmi ziɣen d tidet, ruḥeɣ ɣer umekkan-nni, sutreɣ-as ayen nwiɣ, yerra-yi-d inna-yi-d meqbuleḍ. Mmi-s isteɛmel ittu inna-as:
-tettamneɣ dɣa s tigi ! Inna-as akka akken ur tt-isfaq ara. Ilemẓi-nni iqqim isussem akken yumayen irra iman-is am wakken yella kra i t-iceɣben. Ass wis teltyam tenṭaq yemma-s ɣer-s :
-aɛni yella kra i ak-yuɣen a mmi ! ɣur-i yiwen n cɣel, wellah ar ɛewqeɣ amek ara am-d-bduɣ awal ! ini-yi-d kullec a mmi ulac d acu ara tefreḍ ɣef yemma-k ! bɣiɣ ad am-d-iniɣ awal ameɛna amek akken kan ! kfu-t-id kan a mmi akken ad ifsus wul-ik. ihi a yemma akka ara tettwaliḍ ɛemmi iḍaɛ weḥd-s ulac wi ara t-irefden d tewser ara d-iteddun, lukan ad tqubleḍ ad tesbeddem axxam di sin ulac am wakken.
-a mmi mačči da ara ɛeddiɣ awal-ik, akken twaleḍ ilha ad xedmeɣ.
Yettkemmil…
Ramdane Lasheb