I lmend n umulli wis 37 n tefsut n yimaziɣen, d umulli wis 16 n tefsut taberkant, aɣerbaz alemmas n sin yimeɣrasen Tellal Mohamed n taddart n Akaoudj smektan-d tidyanin n 1980 d 2001. Ihi leqdic yella-d ass-nni n ahad tameddit n wass, deg tlemmast n uɣerbaz-agi. D leḥrara-nni n tnemhalt d kra n yiselmaden, ladɣa wid n tmaziɣt i yesawḍen ad xedmen ahil s wazal-is, ulamma ur heggan ara iman-nsen armi d ddqiqa taneggarut, yerna ur sɛin ara aṭas n wadeg anida ara xedmen leqdicat. Armud-agi, yebda si 13h00 n uzal, imi tasebḥit ɣran warrac. Bdan leqdic-agi s kra n temsikniyin i icudden ɣer yidles d tmagit tamaziɣt, gar temsikniyin-agi llant tid n tgella (lmakla) : tiɣrifin, lemsemen, lexfaf, aɣrum aqquran, sseksu, berkukes, abisar…atg. D lemwakel i d-wwin yinelmaden s timmad-nsen seg yixxamen-nsen. Llant tid n yidlisen, tid n tɣawsiwin tiqburin, tella-d diɣ temsikent ɣef tudert d yimuhal n Lmulud At Mɛemmer, tella-d temsikent n wumuɣ n yismawen n 24 n yimdanen yettwaṭṭfen ɣer lḥebs deg 1980. Yella-d usrag d amecṭuh sɣur Massa Saddallah Farida, d taselmadt deg uɣerbaz-agi, i d-imeslayen cwiṭ ɣef tefsut n yimaziɣen (ssebba-s, ineḍruyen, s wacu i d-tegla…). Am wakken diɣen i d-tella tɣuri n yisefra sɣur kra n yinelmaden yeqqaren dina. Ayen iggerzen aṭas deg leqdic-agi, imi tuget n tselmadin lsant-d tiqneddyar n leqbayel, ula d tanemhalt n uɣerbaz-agi s tqenddurt n leqbayel i tettawi tettara. Mebla ma nettu tinelmadin diɣen i d-yerzan seg uxxam ɣer uɣerbaz s tqenddurin, ma d inelmaden s yibernas icebḥanen. Massa Ait Taleb, d tanemhalt n uɣerbaz-agi tenna-d : “Nessarem iɛejba-asen i warrac leqdic-agi ameẓyan, nessaram tikkelt i d-iteddun ad nexdem ugar. Neɛreḍ ad d-nsiken iman-nneɣ belli d Leqbayel , d Imaziɣen ama s umeslay, ama s lebsa, neɣ s lmakla…atg. Nexdem kan ayen iwumi nessaweḍ imi ur nesɛi ara amkan iwessiɛen ideg ara txedmeḍ kra n leqdic meqqren. D tikkelt tamezwarut ideg ara nessfugel 20 yebrir, ncallah mačči d taneggarut, nessaram diɣen ad nili d amedya i yiɣerbazen-nniḍen, i wakken ad xedmen ayen iwumi zemren swayen sɛan d ttawil”.
Adaoun Abdelghani