Aqejmamar d azwel i yextar umsefɣul « caricaturiste » ilemẓi Mass Kamel Bentaha, i tesfift-is tis snat n wunuɣen, i d-yessuffeɣ deg ussan-agi kan iɛeddan ɣer tezrigin Asirem n Tubiret. Ula d tikkelt-agi s tutlayt n tmaziɣt, mbeɛd mi d-yessazreg yakan yiwet deg 2015, s uzwel «Ʃeẓẓi akked Ʃezzul ». Yewwi yis-s arraz amezwaru deg Tfaska tagraɣlant n tesfifin n wunuɣen n Lezzayer « FIBDA » deg useggas n 2016. D adlis n 16 n yisebtar, llan deg-s 80 n yifɣal s tutlayt n tmaziɣt, yettnuzu s wazal n 200DA deg tnedlisin. Tasfift-agi n wunuɣen, tebna ɣef xemsa n yiwudam d igejdanen (aqejmamar akked tmeṭṭut-is), d tlata-nniḍen (iseɣ, azger d uzrem). Issefek, ad d-nini belli d netta i ixedmen asuneɣ n yifɣal, d netta diɣen i ten-id-isenṭaqqen s tmaziɣt. Lḥasun d taqsiḍt yelhan aṭas i warrac, tesshel i tɣuri, yerna tesɛa izen. Ad d-nini diɣ belli d netta i d amaziɣ amezwaru deg tmurt n Lezzayer i yerran ddhen-is ɣer tesfifin n wunuɣen s tmaziɣt. Nezmer, ad d-nefk agzul n tedyant-agi deg kra tefyar. Yella uqejmamar d amecḥah, yiwen wass iserfa tamɣart-is. Netta yewwi-d iɣes deg tidet, la as-yeqqar d aksum i d-nefqeɣ. Mserfan tuɣal truḥ s axxam-nsen. Yerǧa uqejmamar ad d-uɣal ulac. Γer taggara iceggeɛ azrem yerra-tt-id s axxam. Ad d-nesmekti kan belli, Mass Bentaha Kamel, yettwassnen s yifɣal i yella i xeddem-d yal ddurt deg uɣmis « Le Pays ». Ilul ass n 15 deg waggur n tuber 1968, deg taddart n Cerfa n Behlul deg tɣiwant n Yiɛeẓẓugen deg lwilya n Tizi Uzzu. Yexdem yakan diɣen ifɣal deg uɣmis « Les nouvelles confidences » s tefransist, akked deg tesɣunt i lmend n yigerdan « Nounou ».Yessarem s uxeddim-agi-ines, ad yessiweḍ ad d-yefk timussniwin-ines timeqqranin i yidles d tutlayt n tmaziɣt, akken ad yessbuɣer tamkerḍit n ugdud amaziɣ. Am wakken daɣen ara t-yeg d ttawil swayes ara yessiweḍ tikta-s s arrac imeẓyanen, yerna ad asen-yessiḥmmil taɣuri s tutlayt n tyemmat-nsen. Imi daɣen igerdan ḥemmlen ad walin unuɣen, yerna kerhen adlis meqqren, neɣ yeččur d tira s uberkan.
A. A.