I lmend n 37 n yiseggasen i yezrin ɣef Tefsut n Yimaziɣen, tesmekta-d Tdukla tadelsant “Tazazrayt” n taddart n Tamda, tiɣiwant n Wagnun, ula d nettat am tdukliwin tidelsanin-nniḍen Tafsut n Yimaziɣen. Tesfugel tagnit-agi ass n 21-04 deg uɣerbaz amezwaru “At Mensur Muḥend ”, s yiwen n wahil s wazal-is anda i d-ussan azal n 300 n yimdanen akken ad walin wa ad d-smektin wid yemmuten deg waggur yecban aggur-a. Yebda leqdic s tɣuri n yisefra, syin d ticqufin n umezgun. Tamezwarut isem-is : “Wwet azrem s aqerru”. Tettmeslay-d ɣef tedyanin n yebrir. Ma yella d tis snat : d taceqquft n “Ṭbib” , anda i d-uraren warrac imectaḥ, syin d cna n tnazurt “Dalila Brahimi “ akked terbaɛt n uẓawan n uUxxam n yilmeẓyen n Tamda. Ssulin Lleqdic s ufraq n yiselkinen n uttekki i wid i d-yefkan afus n lemɛawna akken ad smektin tidyanin n 20 Yebrir.Mi i d-nesteqsa yiwen seg yiɛeggalen n Tdukla ɣef usmekti n Tefsut n Yimaziɣen, yenna-d : “Tiddukliwin sɛant azal meqqren deg uwellah n warrac imectaḥ, ladɣa s tceqqufin n umezgun. Anect-a, d ayen ara ten-yeǧǧen tasuta id-yettnekkaren, ur tettuttu ara amezruy“.I usmekti, Tiddukkla tettwaxleq-d deg useggas n 2014 , ma yella d isem i d-as-fkan ( Tazazrayt ), wagi d isem n taddart n Tamda zik .
S. Yamani