Ẓuhra d yemma-s

Partager

(Tullist-agi, tufrar-d deg temsizzelt n 20 yebrir, i texdem tiddukkla tadelsant Itri n Uzekka)

Kraḍ n yiseggasen-a ɣer deffir, tella yiwet n tlemẓit tettidir d yemma-s Taseɛdit deg yiwet n texxamt i d-yezgan deg tlemmast n taddart. Taqcict-a, qqaren-as Ẓuhra, ad tesɛu azal n 36 n yiseggasen deg leɛmer-is. Imi tmeqqer, tebɣa ad tezweǧ am nettat am tezyiwin-is, maca ur as-id-yefki ara Rebbi amwanes. Armi d yiwen wass, yusa-d ɣur-s unexḍab, tugi-t yemma-s ad tt-tefk meɛna nettat terẓa awal-is. Argaz-a, qqaren-as Muḥend, nezmer ad d-nini belli mačči d argaz d wawal, meɛna Ẓuhra tenna-s: “Nekk d wagi ara aɣeɣ, ayen yebɣu yeḍru”. Zrin kra n wagguren, tedda d tislit. Texdem-as yemma-s tameɣra d tameqqrant, xas akken s daxel-is ur tebɣi ara. Muḥend, ur ixeddem ara. Yezga d ssekran, yerna mi d-yekcem ɣer uxxam, ad yewwet akk Ẓuhra. Tameɣbunt n Rebbi, tettarra kan ɣer daxel, ula d yemma-s ur as-tettales ara auen iḍerrun. Taseɛdit, tebɣa ad tesɛu yelli-s agrud ɣef zik n lḥal, acku tmeqqer. Ẓuhra texdem ayen i d as-id-tenna yemma-s, teḍmeɛ ula d nettat ad tesɛu yiwen n llufan. Mi tewweḍ 8 n wagguren deg tadist, teɛya mačči d izli. Ur tezmir ara ad texdem ula d ccɣel, maca argaz-is yal ass yekkat-itt. Tesber tmeɣbunt, mačči d kra, armi d yiwen wass yewweḍ-as-d lexbar i yemma-s, belli tewweḍ leɛfu Rebbi. Yiwen ur yeẓri ara d acu i tt-yenɣan, ma d imdanen izedɣen rrif-is, qqaren-d belli d argaz-nni-ines amcum, d netta i tt-yewwten akk armi temmut.D tagi i d tadyant yeḍran i Ẓuhra meskint, teǧǧa-d ccwami deg wul n yemma-s, ulac win i izemren ad tent-yemḥu.

Trif Lydia

Partager