Argaz issetḥa, inneḥcam qrib ad t-tsebleɛ tmurt, irfed-d amger-nni izzi-d srid s axxam. Yewweḍ-d yufa-d tettraju-t tmeṭṭut-is, urɛad d-telli imi-s, argaz ismar-as-d akk urfan-is yenna-as : -A yir tameṭṭut ! Akka i tebɣiḍ tura uɣaleɣ d taḍsa gar medden. Tekkesseḍ fell-i sser alammi i yi-terriḍ d amehbul. Nekk wwiɣ-am-d amger kemm teqqareḍ-iyi-d d lemqes ! D acu-t wagi ! Tebɣiḍ ad iyi-tesderwceḍ !
-Ay argaz ayen iyi-d-tewwiḍ d lemqes mačči d amger ! Amek tenwiḍ win i k-izenzen ad ak-id-yini kelxeɣ-k !
Tameṭṭut tettkemmil deg unamar, teṭṭef kan deg wawal-is teqqar-as wagi d-tewwiḍ mačči d amger d lemqes. Argaz seg iwala tameṭṭut teṭṭef nneqma, tugi ad d-tuɣal ɣer ṣṣwab iɛzem ula d netta ad tt-iḥres alamma tuɣal-d s abrid. Amek ara ixdem, iwwi-tt nettat d warraw-is ɣer wasif. Wwḍen ɣer din, bedden rrif inṭeq ɣer tmeṭṭut-is yenna-as i tura ad d-tiniḍ tidet ad tḥebseḍ nnmara ma ulac ad kem-degreɣ ɣer wasif. D acu t wagi d amger neɣd lemqes ?
Nniɣ-ak ay argaz wagi d lemqes mačči d amger. Argaz idegger tameṭṭut-is ɣer wasif. Inna-as :
– I tura, ad d-tiniḍ d amger neɣ mačči d amger! Tameṭṭut tbelleɛ asif izuɣur-itt akin.
– D lemqes, d lemqes ! Nekk ur zmireɣ ara ad rreɣ lemqes d amger.
– Ini-d a tameṭṭut a tin iwwet Ṛebbi, uqbel ad ifat lḥal , ad d-teǧǧeḍ arraw-im! Tameṭṭut simmal tbeɛɛed si rrif n wasif simmal tzedder deg waman. Argaz issawal-as iqqar-as ini-d, ini-d d amger…Tameṭṭut tettara-as-id d lemqes d lemqes alammi ulac ṣṣut-is. Xas akken tafekka-s akk tezder deg waman, tameṭṭut tessuffeɣ-d ifassen-is tettwehi-d teskanay-d s yiḍuden-is lemqes. Akken alammi zedren ula d ifassen-is deg waman, tennejla tmeṭṭut si ddunit iǧǧel urgaz, gujlen warraw-is. Akka i tḍerru d win ittaṭafen nnmara issengar iman-is d uxxam-is s ufus-is.
Ramdane Lasheb