Snat n temsizzliyin i lfayda n yisdawanen I lmend n usmekti n wass aɣelnaw n unelmad, i d-yettilin yal ass n 19 maggu deg yal aseggas, i d-thegga Tiddukkla tadelsant “Lmulud At Mɛemmer” n tedawit yewwin isem-is, yettwassnen s yisem n ‘Hasnaoua’ . Tesɛa tiddukkla-agi tedelsant aseqqamu-ines deg ugezdu n tutlayt d yidles aɛrab. Timsezwert tamezwarut, tella-d ɣef 10h00 n ssbaḥ, ass-nni n letnayen 22 seg waggur-agi ideg nella, deg yiwet n tzeqqan n temsirin yetabaɛen ɣer ugezdu n Taɛrabt. D akayad n tira d wayen icudden akk ɣer tutlayt d yidles amaziɣt. Ttwajerden deg-s wazal n 35 n yinelmaden, tuget deg-sen d inelmaden n ugezdu n tmaziɣt. Ufraren-d deg-s tlata n tullas, deg umḍiq amenzu tufrar-d Alili Lydia, deg umḍiq wis sin d Kadri Saliha, ma deg umkan wis kraḍ tufrar-d Bounini Thafath. Ma d timszwert tis snat, d tin n tmedyazt, i d-yellan ass-nni n ttlata tameddit n wass deg tzeqqa n yisaragen n tesdawit-agi. Γran-d yisdawanen isefra-nsen, llan wid n tmaziɣt, llan wid n taɛrabt, llan ula d wid n tefransist. Myezwaren 19 n yisdawanen n yigezduyen yemgaraden: tamaziɣt, taɛrabt akked win n tefransist. Ufraren-d deg-s 3 n yinelmaden, imseḍfaren akka : Basselina Lycia, Chatbi Lwiza akked Ben Kaci Ghenima. Mass Hocine Zinia d aselway n tiddukkla-agi, yenna-d: « Nessaram leqdic-agi ameẓyan iɛjeb akk wid yettekkin deg temsizzliyin-agi nexdem. Win yebɣun yerbeḥ imi ɣur-nneɣ nekkni d tamaziɣt i irebḥen uqbel kulec. Iswi-nneɣ deffir n leqdic-agi, d asnerni n tutlayt d yidles amaziɣ, d asnerni daɣen n tmussniwin n yinelmaden d usebɣes n wayen xeddmen. Nessaram ɣer sdat, inelmaden akken ma llan, ilaq ad d-rren lwelha-nsen ɣer tmaziɣt, ulamma qqaren tutlayin-nniḍen neɣ ḍeffren tuzzigin-nniḍen maca aẓar-nsen d amaziɣ. Ihi ilaq fell-asen ad d-fken ayen ssnen d wayen zemren i tutlayt n tyemmat. Ulamma lejyub-nneɣ d ilmawen, s yidrimen-nneɣ i nxeddem leqdicat-nneɣ idelsanen, imi ddula ur d aɣ-tettɛawan ara, yerna nxeddem ayen i wumi nessaweḍ ».
Ghani Amazigh