Seld ugar n sin yiseggasen n unadi, n uxemmem akked uheggi, yuɣal-d ucennay aqbayli Sɛid Kessas, mmi-s n taddart n Wat Xelfun, tawilayt n Bumerdas, s yiseɣrez d amaynut, win iwumi isemma « Ilelli ». D aḍebsi-ines wis ukuẓ i ara d-yeffɣen deg wayyur n yulyu i d-iteddun, ideg llant ṣa (7) n tezlatin s yizwal yemgaraden. Tizlit tamezwarut, isemma-as « Yekker ccwal di tudrin », tis snat « A baba wwten-aɣ », tis kraḍ « Tutlayt-iw », tis ukuẓ « Temẓi-w », tis semmus « Seg Ilizi ɣer l’Elysée « , tis sḍis « Nekk yid-m dayen », ma d taneggarut tis sa isem-is « D acu i nettnadi ». Ayen ixulfen iseɣrez-a ɣef yimezwura, d tilin n taɣect n teqcict Anya i yecnan amsin (duo) akked unaẓur di tezlit n tayri « Nekk yid-m dayen », d uttekki-ines s talilt (chorale) ula di tezlatin-nniḍen. Tikkelt-a, daɣen, yefren Sɛid Kessas, ad yesseqdec ala aẓawan atrar deg uḍebsi-a “Ilelli”. « ssarameɣ aḍebsi-a amaynut ad as-slen lɣaci, ad asen-yehwu… Aql-i leḥḥuɣ ar sdat, mazal ad xedmeɣ alamma wwḍeɣ ɣer wanda bɣiɣ, d wanda bɣan wid i yi-iḥemmlen ». I aɣ-d-yenna Sɛid Kessas. Yuɣ lḥal, acennay-a, yettwassnen imi amecwar-is deg ubrid n ccna yebda-t deg useggas n 1992, anda i d-iban s tesfift tamenzut « D acu i nettnadi ». Ddeqs n wakud, yuɣal-d di 2000 s tis snat iwumi yefka azwel « Cfiɣ i wass », syin, mbeɛd tlata n yiseggasen yerna-d aḍebsi wis kraḍ s uzwel aspenyuli « Los sordos » neɣ Iɛeẓẓugen. Ɣas ma yella Sɛid Kessas d yiwen i yecnan ɣef waṭas n yisental, gar-asen wid n ddunit, layas, timetti, jsk…atg, maca, win i as-yeslan ad yegzu srid d akken icennu s waṭas tizlit tamḥaddit. Imi ad naf tuget n yisental i d-yettawi ttmeslayen-d s uɣiḍi d usirem ɣef tmurt-is d tutlayt-is i yezga iḥemmel-iten seg wul, yettɛebbi-ten d anezgum. D tilufa-a i iceɣben allaɣ-is ugar n tiyaḍ, acku yella, mazal-it ar tura d ameɣnas i yekkaten ɣef yizerfan n ugdud-is aqbayli, ama deg ccna-ines neɣ deg wayen-nniḍen. Annect-a dɣa, yeǧǧa-t ad yesɛu tinnubgiwin n ccna sɣur kra n tmura n Tmazɣa, am Tunes d Libya. Yerna-as-d daɣen leḥmala d leqder sɣur yimeɣnasen i t-yessebɣasen ad isemmed abrid-is, i yettraǧun s lḥir, am wiyaḍ, tuffɣa n yiseɣrez-a-ines i d-iteddun akken ad asen-slen.
Kaisa Khalifi