I lmend n teẓrigt tis snat n temlilit n tmedyazt tazwawt Tawwurt n Lɛenser, ara yilin d tajmilt i umedyaz d ucennay Muḥ Saɛid Ubelɛid, tuɣal-d tdukkla tadelsant Tafat s tiɣri-s i yimedyazen i iran tikkin, neɣ i ijerrben yakan ttiɛad-a deg tedwilt tamenzut. Aya, ad d-yili s tallelt n usqamu aɣerfan n lwilaya (APW) n Tizi Uzzu, Tanmehla n yidles n lwilaya n Tizi Uzzu, Axxam n umezgun amniḍan Kateb Yacine, Asqamu aɣerfan aɣiwan n Assi Yousef akked tesqamut n taddart n Ait El Kacem, D timsizzelt ara d-yilin gar 12 alamma d 15 deg waggur n yulyu i d-iteddun, deg taddart n Ait El Kacem deg tɣiwant n Assi Yousef, yetabaɛen ɣer ladayara n Boughni. Ilaq kan ɣef yal yiwen i iran ad yekki, ad yaru ɣer tansa-a taliktrunant : tiddukla-tafat@outlook.fr. Neɣ ad yessiwel ɣer wuṭṭunen-a n tilifun i wugar n yisallen : 0781 47 36 92/ 0554 59 19 44. Aya send 25/06/2017. Ssaramen yimheggiyen, ad yeḥsu yal amedyaz s usaḍuf n tikkin, akken ad ilin akk deg tegnatin igerrzen mi ara d-yaweḍ usihar. Ladɣa imi ɣur waṭas n yimedyazen, timliliyin i yecban ta mačči kan d tagnit i usɣerbel d uktili n uswir n yisefra-nsen, maca d rreḥba ɣlayen i umlaqi n yimedyazen-nniḍen d umbaddal n tektiwin yid-sen. Ad d-nesmekti dakken ta d tiddi tamezwarut n useɛlem n yimedyazen. Ma d azemz n uxdam n temlilit-a yetturaǧu i wussan n 12, 13, 14, 15 deg wayyur n yulyu i d-iteddun.
M. K d A.G