I lmend n tallit-agi n Remḍan, ilmeẓyen n taddart n Tahanouts, yetabaɛen ɣer tɣiwant n Ait Aissa Mimoun, heggan-d yiwet n tmeɣra n ccna meqqren. Tebda tmeɣra-agi ɣef 22h00 n yiḍ alammi d ṣṣḥur, ccnan deg-s ugar n 10 n yicennayen imeẓyanen n taddart-agi n Tahanouts. Tella-d, ddurt iɛeddan, deg umkan iwumi qqaren Ighil Badhou, tama n unnar n Sidi Slimane. Ayen igerrzen maḍi deg tmeɣra-agi, imi kulec yettwaxdam sɣur ilmeẓyen n taddart-agi, ama d ifennanen i d-yecnan gar-asen Marsghsan (Amar Yarkel), Kasdi Kamel d gma-s Belaid, Kasdi Djamel, Jouba Touat, Oudiai Nassim d gma-s Farid, Korichi Hocine…atg. Tella-d diɣ tɣuri n yisefra sɣur yimedyazen yecban: Tchamouh (Zateri Mouhamed) akked Brahim Cherdi. Ula d wid yuraren ɣef wallalen uẓawan d arraw n taddart-agi, ama d wid yewten dderbuka neɣ wid yewten abendayen neɣwin yewten tagitart. Korichi Hocine, yenna-d: “ D tikkelt tamezwarut ara d-aliɣ ɣef usayes deg ddunit-iw, cniɣ-d tlata n tezlatin n teqbaylit, ulamma s tugdi d ukukru n yimferǧen, maca cukeɣ fɣent-d akken yelha. D tameɣra n taddart-nneɣ, ad asen-iniɣ i yimsuddsen-agi tanemmirt-nsen s tusda, ssarameɣ-asen afud igerrzen”.
Adaoun Abdelghani