Am yal anebdu, tamurt n Leqbayel yettrajun tallit-a i tmeγriwin d tisin n warraw-is seg lγerba, tettuγal d amraḥ i lhem n tmes i d-ittfeggiden d iɛeğğağen, tesseblaɛ mebla tawant ayen akken akk i tesɛa d lxir.
Akken kan yendeh uzγal n unebdu, yekker uhetwir deg yimezda&gamma,; imi ajajiḥ n tmes yewweḍ-d s ixxamen. Dγa, akken kan ara tkecmed Dreɛ Lmizan, mi ara d-tekkeḍ seg Tubiret, nnig neγ ddaw n ubrid, ulac amkan i tezgel : yerγa uzegzaw, yegla s uquran. Urtiyen imerra beddlen ssifa, tizzegzewt tdel-itt tebrek n tmulin, akal d amellal seg yiγiγden. Jbu akken alamma d ilel, Timizar qrib i kfant. Ulamma iγallen n usellek ur γfilen ara, maca ttawilat i kesben ur zmiren ad qablen yis-sen tawaγit i d-yersen. D imezdaγ s timmad-nsen i ibekksen, yal wa s wacu i wakken ad rren tilas i ujajiḥ. D azγal yewwḍen s ayen ur iqebbel leɛqel, akessar d usawen rnu ddiq n yiberdan ! S wacu ara iqabel umdan nnger i d-yersen γef tmurt ? Ɣef leḥsab n yisallen i nesɛa, d luluf n yihiktaren i yerγan seg yimγan d yisekla. Tiγrasin n tzizwa ur yelli leḥsab, iγersiwen ama d wid n lexla ama d wid yettrebbi umdan. Meɛna tamsalt n terwiḥin ur tesɛi tawwurt. Dγa akka tura, deg uzeṭṭa imetti i d-yewwedḍ yisalli n tmettant n yiwen n yilemẓi n 17 n yiseggasen di leɛmer-is deg taddart n At Lqayed deg Yiwadiyen. Ilemẓi-a, yellan yuḍen buneggaf, ur yessaweḍ ara ad yizmir i unaγur d ddexxan i d-tettak tmes, dγa yessufeγ tarwiḥt. Ula d amγar-nni meskin yuzzlen ad d-isellek aγersiw-is, ur t-zgilen ara yilsawen n tmes. Ayen iḥuzan ass-a azamul n tmurt n Leqbayel d tazemmurt-nni yuγalen d iγed ! Ur telli d aseklu yecban wiyad, imi yis-s i yettwassen, seg-s i d-yettawi rrezq-is. Ur nezmir ad d-nini acḥal i yerγan, meɛna lexsara meqqert. Deg tama n wadda, lewhi n Bgayet, liḥala ur tgerrez ara, dγa d taddart n Tigrin deg Yiγzer Ameqran i yettkuffuten akka tura. D tiγri akka i d-gren waṭas n yimdanen i usiweḍ n waman γer dinna. Maca, akken yebγu Uqbayli yili, deg teswiɛin n ddiq yekfa wuγal γer deffir. Aya, beggnen-t-id deg yal taswiɛt, almi ula d times qublen-tt s ttawilat meẓziyen meɛna s tebγest iǧehden. Ass-a, awal yuzzelen deg yilsawen : γer melmi ara tettidir tmurt n Leqbayel lihḥala-a n tmes n yal aseggas ?
M. S.