Ass n ssebt 29 di yulyu 2017, Lezzayer terra timedlin i yiwen seg warraw-is, anagi aneggaru yettekkin deg lemwata n Evian, yerran talast i tegrawla. Wagi d Réda Malek, ilulen deg Tbatent ass n 21 deg dujember 1921. Tiḥerc-is, d lehrara yekseb γer tlelli n tmurt-is, ğğant-t ad yettef imukan imezwura deg unnar n umennuγ i wakken deg useggas n 1955 yesbedd yiwet n tejmaɛt iwumi isemma « Timlilit tamatut n yinelmaden inselmen Izzayriyen ». Dγa d ttawil i yessexdem i wakken ad taγ tegrawla amkan-is deg yimukan n leqraya, ama d tasnawit neγ d tasdawit. Aya, yelli-as tiwwura i wakken ad yili γef uqerru n uγmis El Moudjahid i yessexdem FLN. Wagi da&gamma,; d ttawil-nniden i usiweḍ n teγri n yimjuhad ama i yizzayriyen i merra neγ ahat i leğnas i wakken ad d-rren lwelha-nsen γef wayen yettidir ugdud d uzaglu yersen fell-as. Asmi yewwed lweɛd γer undah n lemcawrat γef timunent, Réda MALEK yedda deg terbaɛt iγef yella Krim Belkacem d aqerru. D amdan i idefren amecwar n tegrawla, yella deg waṭas n yimukan send timunent almi d aseggas n 1989 yeslal-d yiwen n ukabar ANR anda ikemmel i ubrid n umennuγ γef tigduda. Asmi tezzi tlafsa i tmurt, rrebrab isers-d lxuf deg uzal γef yimdanen, Réda Malek yeqbel ad yili d aqerru n teγlift, anda yeɛred ad yessebded ttawilat iwulmen i wakken ad yemḥu aṭṭan-a yebγan ad yessenger tamurt. Di tallit-nni dγa i d-yenna : « Tugdi ilaq ad tbeddel tama. ». Tamettant-is d tin qerriḥen imi d anagi aneggaru n lemcawrat n Evian i iruḥen, d ayen mebla ccek ara iḍurren tisutwin i d-iteddun imi ur ttafent ara win ara d-yalsen i tedyant-a akken i tella.
M. Smail