Qqaren-as zik-nni di lemtel: “ansa tekkiḍ iUqbu d asawen. Tura tbeddel tuɣal ansa tekkiḍ i Uqbu d rṣaḍ .Liḥala ideg ttidiren yimezdaɣ n Uqbu ur tessefraḥ ara: iresḍan d yir tariḥet deg ussan unebdu anda tiseddarin n uẓɣal ttalint, ttawḍen alma d 45 n tseddarin, d ayen i izemren ad d-yeglu s kra n lehlak i yimezdaɣ. Aya s sseba n yireṣdan ur ntteffeɣen ara, imi agudu n tḥaract anda surugen iḍuman medlen-as yimezdaɣ n Bizyu tawwurt. Imezdaɣ-a qqaren d akken times i ttecɛalen deg ugudu, tettḍuru-ten imi yettaweḍ dduxan s ixxamen. Win ara d-yerzun ɣer temdint n Uqbu d tudrin i as-d-yezzin, ad yewhem deg remmuɛen n rṣad yersen di yal tiɣmert: deg yiberdan, di ssuq, rrif n yiɣerbazen…atg. Tettaweḍ rriḥa ula ɣer yimuḍan yellan di sbiṭar. I usmekti deg useggas 2014, imḍebren n tɣiwant n Uqbu ṛegmen i yimezdaɣ belli uguru-agi n ugudu n tḥaract ad yefru, maca kra ur d-yelli d amaynut. Teṭṭes tissiret ɣef uwren. Ma nmuqel akka ɣer ttawilat tesɛa tɣiwant n Uqbu, ad naf d akken tella gar tɣiwanin timerkantiyin n tmurt n Lezzayer. S wallalen i tesɛa, tezmer ad tefru ugur n usizdeg n twennaṭ s shala, imi tadrimt tella : “ ikabaren n tsertit d imḍebren n tɣiwant d yiɛeggalen i ɛemren Asqamu aɣerfan tɣiwant, ad d-tiniḍ ttun ɣef wacu i d-bedden, almi teɛfen akka tegnit ɣef yimezdaɣ, tezmer ad teglu s waṭṭan imeqranen deg uẓɣal-agi n unebdu. Wamma mačči d tadrimt i ulac ” i d –yenna yiwen umezdaɣ n taddart n Riki iteddun ɣerr tɣiwant n Uqbu. S wakka ’’ad teqqim tuɣalin ɣer twizi gar yimezdaɣ am wakken xedment tjemuɛa n tudrin n leqbayel zik-nni, d allal i Wat Uqbu ma bɣan ad idiren di tezdeg, ur d-yegri lettkal ɣef yimḍebren n tɣiwant d yikabaren n tsertit ’’. i d-yenna Naser, amɣar n lbaraka n Uqbu .
Brahim benhamouche