Neḥsa tuḍen taggara-a tcennayt Louiza armi d-tger tiɣri i wat d wid-is deg yiwet n tvidyut ad tt-ɛiwnen i udawi. Dɣa, ddurt-a iɛeddan mi d-tuɣal si Fransa, yella-aɣ-d wawal d afessas yid-s.
Aɣmis n Yimaziɣen: amek tettiliḍ akka tura a Nna Lwiza?
Nna Lwiza: Tura usiɣ-d kan, kra n wussan ad uɣaleɣ ɣer Fransa. Idaq lxaṭer-iw. D ṭṭbib i yi-d-iserrḥen. Nniɣ-as ma yehda-k Rebbi, serreḥ-iyi ad qqimeɣ kra n wussan deg uxxam-iw. Ma yella kra i yi-yuɣen, a-t-an ẓriɣ-d tamurt.
Nwala-kem tettwaḥuzaḍ, yehwa-am lḥal mi d-ddan yid-m Yiqbayliyen?
Ih! Amek ihi! Yis-sen i ttqabaleɣ aṭṭan-a. Ɣilleɣ ur i yi-ḥemmlen ara annect-a Yiqbayliyen, nniɣ-as ur swiɣ annect-a ɣur-sen, a ziɣ ḥemmlen-iyi s tidet.
Yella win i d-yesteqsan fell-am seg yimḍebbren n ddula neɣ ulac?
Ala, yesteqsa-d uneɣlaf n tezmert. Yenna-d kcem-d ɣer Tizi Uzzu ad kem-ndawi. Nniɣ-as mi lliɣ dinna ur yelli win i d-yessawlen, tura mi aql-i di Fransa tebdam… Tanemmirt tameqqrant i Yiqbayliyen! Asmi i yi-d-usan kra n yilemẓiyen s tkamiratin nnan-iyi-d ur kem-nettaǧǧa a Nna Lwiza, ilaq ad tegreḍ tiɣri i temɛiwna. Dɣa teẓram yakk amek i d-ssawleɣ. Mačči d ayen isehlen ad tgeḍ askanir s 5000 neɣ 6000 n yiyuruten.
Ula d ccna terriḍ-t ɣer tesga, ad d-telhuḍ d tezmert-inem…
Ih. Yella umaynut i bdiɣ send ad d-ɣliɣ deg waṭṭan, a-t-an tura deg ustudyu. Ur zmireɣ ara ad as-kemmleɣ lawan-a. Ula d taɣect-iw tuḍen.
Yesteqsa-tt: Mhenni Khalifi