Ad idir temdint n Montreal 123 ddqayeq n tewlafin n usaru amaziɣ deg tfaska ara d-yilin ass n 30 deg wayyur anda nella deg uxxam n sinima n Québec. Ahil d amesbaɣur imi ad ɛeddin 6 n yisura imeẓyanen, wigi d asaru n Tahar Houchi s uzwel n ‘’Yidir’’ anda i d-yettmeslay ɣef Jugurta d yiwen umeɣnas i igedlen i mmi-s Yidir lmerwaḥ ɣer uɣerbaz. Asaru-a, yesɛa 12n ddqayeq. Asaru wis ssin isem-is ‘’Regards ‘’ wagi yessuffeɣ-it-id Noureddine Kebaili. Yettales-d taqsiṭ n Marie-Louis d yiwet i yettidiren di tmurt n Fransa, laṣel-is d azayri, teṭṭef di rray-is akken ad tuɣal ɣer tmurt-is i wakken ad twali tamḍelt n baba-s. Dinna, ad temlil d Lwennas anda ara d-tessekfel aṭas n temsal. Asaru, ad yeddu 26 ddqayeq. Ma yella d asaru wis kraḍ, wagi n Reda Amrani. Yesɛa 14 nddqayeq s uzwel ‘‘D wagi i d asirem’’. Dagi, Mass Amrani, yerra tajmilt i tmeṭṭut taqbaylit imi tesɛa azal meqqren, acku d nettat i iḥudren ɣef tutlayt d yidles aqbayli mgal aɣebbar n tatut , syin d asaru i ysɛan 20 ddqayeq i d-yessufeɣ Ali Reggan iwumi yefka azwel n ‘Rose Hallal’. Am wakken ad iɛeddi yiwen usaru isem-is ‘’Un kabyle de palestine’’ n Tahar Houchi d yiwen n uglam u wudam nuqbayli i yettidiren di tmurt n Liban , yessaram ad yuɣal ɣer tmurt n lejdud-is , asaru-agi, yesɛa 20 dqayeq . Mi i d-nesteqsa Mass Houchi Madjid ɣef wamek i d-tussa tikti i tikelt tamezwarut ɣef tfaska yenna-d : “Aseggas-aya nekni nettmeslay, nesqardic tamsalt d unemhal n tẓuri n FIFOG Mass Houchi Tahar. Syin, tlul-d tdukkla Fifam anda i d-nhegga leqdic-a n usaru agraɣlan amaziɣ i tikkelt tamezwarut. Yenna-d d akken aṭas n uxeddim i mazal deg ubrid-a n sinima Amaziɣ .
S.Yamani