Yemma-s tεuhed Ṛebbi, tedda-as di lebγi. Tuγ-as aεeqqa issawalen, terna-as alγem d taklitt. Taqcict teddem-iten, tuγ abrid-is, tṛuḥ ad tnadi γef watmaten-is. Teggul, tenna-as: «Ɛahdeγ-k, a Ṛebbi, ur d-nṭiqeγ alamma d asmi ara d-nnulfun watmaten-iw». Tṛuḥ, tiγilt iwumi tfel γas ta, tiγilt iwumi tfel γas ta. Armi qrib ad taweḍ, taf-n yiwet n tala n taklatin. Yuγ lḥal, txutel-itt deg ubrid taklit, tuker-as aεeqqa-nni yessawalen. Mi tfaq teqcict-nni, yaf-d lḥal ur tezmir ara ad as-tsiwel imi tεuhed Ṛebbi ur d-tenṭiq alamma nnulfan-d watma-s. Mi wwḍent γer tala n taklatin, tenṭeq γur-s taklit tenna-as: «Sired tura dagi». Taklitt teẓra d acu i d lmeεna-s. Teddem teqcict tessared di tala-nni, dγa tuγal d taklit taberkant ula d nettat. Ddant, ddant, ddant… armi wwḍent γer tala n tḥerṛiyin, teddem talkit-nni aεeqqa-nni yessawalen, tessared yis-s din, dγa tuγal taklitt d tacebḥant. Mi d-kkrent ad kemmlent abrid, tettu-n aεeqqa-nni yessawalen di tala. Armi wwḍent γer watmaten-is, taklit-nni terra iman-is d nettat i d uletma-tsen. Feṛḥen yis-s, rran-tt d tamṛayt n uxxam. Ma d uletma-tsen rran-tt d taklitt, tkess-asen ileγman. Ttaken-as taḥbult n uqecquc. Kul sṣbeḥ, ad teddem taḥbult-nni, ad tenheṛ tajlibt-nni n yileγman γer teγzut ad ksen. Mi tewweḍ γer din, ad tali s ufella n yiwen uẓru, ad tcennu: «εlay! εlay! εlay! Ay aẓru! Ay aẓru! Ad waliγ tamurt n baba d yemma! Ad waliγ baba d yemma! Taklit rran-tt i uxxam! Uletma-tsen rran-tt i yileγman! Rut ay yileγman ma ad trum! » Dγa ileγman-nni msakit ad ttrun, ala yiwen, d aεeẓẓug. Akken, akken, akken armi d yiwen wass, yenna-asen yiwen deg watmaten-is : « Ileγman-inna-nneγ simmal ḍeεεfen. D acu ten-yuγen akka? » Wayeḍ, yenna-asen: « Wissen acu i sen-tettak εni taklit-nni? »… Tettkemmil…
Seg tgemmi taqbaylit