S uḥḍar n yimeqqranen n taddart, n yimḍebbren n tdayra d tɣiwant n Yiderginen, deg usamar n Bgayet, tella-d, acer-a iɛeddan, teldayt n tqenṭert n Teɣza i tebna Tdukkla tadigant « Oxy-jeunes » lwaḥi d waṭas n yiwaziwen n temnaḍt deg taddart n Ayt Felkay. Deg temlilit, yewwi-d tazwara awal uselway n tdukkla-a mass Xaled Fuḍil ɣef wuguren i d-muggren send ad d-siwḍen asenfar ɣer wanda yewweḍ, am wakken yebder-d kra n tlufa i yerzan aselhu n uḥric n tmerrit deg temnaḍt. Dɣa llan ɛeddan yimeḥḍar ulin ɣef tqenṭert-nni tamaynut, ad ḍillen ɣef wamek muggen lecɣal, d tmuɣli i d-tettak ẓelmeḍ yeffus deg tlemmast n tzegzewt. Tiqenṭert-a, txeddem deg teɣzi azal n 21 tmitratin, deg tewseɛ tamitra d settin n yisuntimen, ma deg teɛlayt seg tmurt ɣur-s 2 n tmitratin. Deg sin n wayyuren d 19 n twiziyin, sawḍen yiwaziwen ad tt-bnun s ssiman ijehden ladɣa d wuzzal. Imi ɣer taggara, tekker-d s lqidar n 95 n yimelyan santim, ɣef wawal n yiɛeggalen n tdukkla « Oxy-jeunes ». S usemmed n ccɣel-a, ad yuɣal yeshel i yimezdaɣ n taddart-a n At Felkay ad calin deg teẓgi-nsen s laman, neɣ ad lfun iḥerqan s teɣseb. Ula d imerrayen i iḥemmlen agama, ad d-afen tagnit yelhan i uḥewwes deg umkan-a igerrzen war leɛtab. D yiwen dɣa gar yiswan n wid yessulin aqeddic-a, mi d-nnan belli bɣan ad as-gen ugar azal i tmerrit deg temnaḍt-nni i yettwassnen s ccbaḥa-s. Tis snat, deg-s daɣen ad allen neɣ ad fken afud i yikerrazen-nsen i ixeddmen akal deg yidurar, maca yewɛer-asen amek d wansi ara kken i tferkiwin-nsen. Ugar n usnemmer n wid akk yekkin deg usenfar-a, tettak-d ttiɛad tdukkla « Oxy-jeunes » i tigawin-nniḍen yecban ta.
M. K.