Timecreḍt d yiwen seg wansayen i tesεa tmurt n Leqbayel. Xeddmen-tt deg leɛwacer (lɛid , taɛacurt, lmulud…) neɣ deg kra n tegnatin am tallit n tkerza neɣ azemmur.
Tikkelt-agi, nextar ad d-nawi awal ɣef tmecreḍt n ḥertadem deg tɣiwant n Ait Aissa Mimoun. Deg tazwara, nefren ad-nemmeslay s telqay ɣef lewziɛa n taddart n Tahanouts, syin ad d-nejmel akk tuddar-nniḍen i tt-ixedmen, ama ass-nni n umenzu n unbir neɣ ass-nni n lǧemɛa yezrin. Deg taddart-agi n Tahanouts, yeṭṭafaren ɣer tɣiwant n Ait Aissa Mimoun, uɣalen yimezdaɣ-is aseggas ɣer wansay n lewziεa, yettwassnen s yisem n tmecreḍt n ḥertadem, i d-yettilin yal aseggas deg tazwara n waggur n unbir. Mebɛed mi ur tt-xdimen ara deg useggas iɛeddan, maca ass n lǧemɛ yezrin i d-beggnen iman-nsen belli mazal-iten ṭṭfen deg lɛada-agi n lejdud. Tasebḥit n wass-nni n lğemεa 3 deg waggur-agi n unbir ideg nella, fɣen yimezdaɣ n taddart-agi qeccic meccuc (irgazen, ilmeẓyen akked yigerdan). D timḥezwirit ɣer unnar n Sidi Slimane ideg i d-tella lewziɛa-agi. Ɣef 07h30 n ṣṣbeḥ, mlalen-d akk ɣer umkan uɣur msefhamen, yal wa d acu i d-yewwi: wa d ajenwi, wa d taqabact, wa d tacaqurt…atg. Annect-agi, yusa-d mebɛed mi temlal tesqamut n taddart akked yimezdaɣ-is ass-nni n lǧemɛa 20/10/2017, ideg i d-jemɛen azal n 135 n yimelyan s wayes i d-uɣen rrebɛa n yizegaren i iweznen lqidar n 13,5 n yiqenṭaren, idrimen-agi d arḍal-iten-id-reḍlen yimezdaɣ, rran jemɛen-d azal 26 n yimelyan, 8 deg-sen ass-nni leǧemɛ 20/10/2017 ma d 18 i d-yeqqimen jemɛen-ten-id tasebḥit n wass-nni n lewziɛa. Syin akkin ɣef 08h00, bdan zellun-ten imezdaɣ n taddart, wa deffir wa, s nnuba kan. Syin uzan-ten, yal tarbaɛt teṭṭef yiwen uzger. S unecraḥ d teḍsa i xeddmen yilmeẓyen-nni, mi yeɛya yiwen, wayeḍ ad t-id-yestaɛfu amzun akken d tacemilt neɣ d tiwizi n taddart merra. Ma ɣef 11h00 uzal, bdan afraq n uksum ɣef 328 n tisɣar, yal yiwen ad yawi amur-is seg wayen yellan deg uzger (ul, tasa, aksum, iɣes,…). Syin ɣef 14h00 n tmeddit, yal wa yeddem tasɣart i t-id-iṣuḥen. Ma d imeɣban neɣ wid ur nezmir ad xelṣen sehma-nsen, wwin-tt baṭṭel. Yal tasɣart tseɛεu gar 4,5 ar 5 kg, tenza s wazal n 4000 DA. Am wakken daɣen i xedmen ayen iwumi qqaren seksu Rebbi neɣ tameɣra Rebbi, anida i d-nawlen medden ayen zemren, wa d seksu s yibawen, wa d seksu s lubya…atg. Lukan d lebɣi xeddmen-t uqbel lewziɛa, ass-nni ideg ara d-jemɛen idrimen d lewɛadi, maca aseggas-agi, ǧǧan-t armi d ass-nni n tmecreḍt. Ma d tura, ad d-nuɣal ɣer tuddar-nniḍen i ixedmen lewziɛa-agi n ḥertadem deg tɣiwant n Ait Aissa Mimoun, llant-d akka. Ass-nni n larebɛa amenzu n unbir, d tudrin-a: Akaoudj, Ighil Bouchene, Imkechrene, Boussouar, d tiyaḍ. Ma d tid i tt-ixedmen ass-nni n lǧemɛa iɛeddan 3/11/2017, d tigi: Tahanouts, Ait Khelfats, Ikhelouiene, Igunane Amuer, d tiyaḍ-nniḍen. Ɣer taggara maḍi, ad d-nawi awal ɣef wazal ameqqran i tesεa lewziεa deg tmetti taqbaylit, ama zik ama tura. D tagnit ideg ttemlilin medden, imi yezmer lḥal aseggas ur ttemyagaren ara, imi yal yiwen yelha kan deg ccɣel-is, am wakken qqaren zik:“ tTemmlal tasa d way turew”. D tagnit daɣen, ideg ttemεawanen yimdanen gar-asen, imi yal yiwen ad yexdem ayen iwumi yezmer. D ass ur necbi wiyaḍ, imi taddart si rrif armi d rrif ad tečč akk yiwen n yimensi s uksum, am ugellil am unesbaɣur, yiwet n lmakla ara ččen. D tagnit anida tettnerni tegmat, tddukkli, tiwizi, anida daɣen ttiğhidden wassaɣen gar yimezdaɣ n yal taddart. Ma d iswi n lewziεat-agi n ḥartadem, ɣef wakken i d-qqaren yimɣaren, xedmen-tt i lmend n tfellaḥt, ssuturen deg Sidi Rebbi ad d-tili ṣṣaba deg nneεma, ad d-yessew wakal s waman n ugeffur, ad issebεed tiwaɣiyin n twennaḍt, imi daɣen imir i ibeddu useggas n tfellaḥt ɣer yimaziɣen, dɣa ssuturen deg uxellaq ad yili d aseggas n ṣṣaba d lerzaq… atg.
Adaoun Abdel Ghani