Anegmu akked tneflit deg lwilya n Tizi Uzzu, yeḍḥa-d d asentel agejdan gar wawalen i d-yenna Amara Benyounes, aselway n umussu agdudan azzayri, deg temlilit i yexdem akked yimeɣnasen-is d yimezdaɣ n lwilya n Tizi Uzzu, deg tzeqqa tameqqrant n Uxxam yidles Mulud Mɛemmri, ass-nni n lexmis 9 deg unbir 2017.
Yeḍra-d usiher-a, i lmend n ddiɛayat n tefranin ara yilin ass n 23 deg waggur-agi deg-i i nella. Mebɛed mi d-yefka yimḍebber amezwaru n MPA deg Tizi Uzzu, ismawen n wid i d-ibedden ɣer yiqerra n tselwayt n 20 tɣiwanin APC akked usqamu aɣerfan APW n Tizi Uzzu, yettunefk wawal i uselway n MPA i wakken ad yehder s telqayt ɣef wuguren n unegmu i tettidir lwilaya n Tizi Uzzu. « Aɛdaw-nneɣ awḥid, d yir liḥala n unegmu deg wayeg tella tmurt n Tizi Uzzu. Tifrat n tmukrist-a, tezmer kan ad tili s tugdut, ad xḍun yimezdaɣ i cwalat, axater cwal ysserwal ɣef tama-gi wid yebɣan ad sseftin idrimen-nsen deg tdamsa. Ttmenyifen ad ruḥen ɣer tamiwin-nniḍen anida terked teswiɛt », i d-yenna uselway n MPA, Amara Benyounes, i iwalan d akken « amennuɣ ɣef tugdut akked tmaziɣt, ur ilaq ara ad aɣ-yessebɛed ɣef tdamsa d unegmu deg lwilaya-agi ». Ayen yeǧǧan tamurt n leqbayel ad tuɣal ɣer deffir seg yal aḥric, ɣef wakken i t-i-yesmekti Mass Benyounes. « Ɣef wanect-a, dɣa, i yextar ukabar Amussu agdudan azzayri tanfalit-is deg ddiɛayat-agi n tefranin « Tugdut s lehna », ikemmel yenna. Ma ɣef wayen yeɛnan ikabaren-nniḍen, iwala d akken d lawan ad d-ffɣen seg cciɛat-nni n umezruy, ad d-uɣalen ɣer unnar n tugdut ma d tidet-nsen bɣan ayen yelhan i tmurt. « Ilaq ad d-ffɣen seg-s wid-nni yettmeslayen s yisem n umezruy. Ilaq ad kecmen annar n tugdut. Llan ɛad wid yettmeslayen ɣef 2019 akka tura deg useggas n 2017. Netta yuɣ lḥal aql-aɣ deg tefranin n tɣiwanin akked yiseqquma mačči deg tid n tselwayt. Win yebɣan tifranin n tselway, yerǧu aseggas n 2019 ». Deg wayen yerzan ahil n ddiɛayat n tefranin n 23 deg unbir 2017, yessers-d Umussu agdudan azzayri sin n yisumar igejdanen ɣer unnar-agi : aṭas n tugdut akked waṭas n leḥkem i yiselwayen n tɣiwanin d yiseqquma iɣerfanen. « Ulamek ara yeḥkem lwali deg uselway n usqamu aɣerfan n lwilaya, neɣ ad yeḥkem imḍebber amezwaru n dayra deg uselway n tɣiwant ? », i d-yessegza Benyounes. Xas ulamma tamsalt, ur teɛni ara kan aḥric-agi n tsertit, imi ula d iḥricen-nniḍen, ur yesɛi ara uselway n tɣiwant tilleli i wakken ad iḍebber deg kra n temsal, ladɣa, tin yerzan akal akked lebni. Ula deg tama n laman n yimdanen, iwala uselway n MPA d akken laqen yiɣallen uzzigen n laman n tɣiwant ara yesdukkulen lecɣal akked wid n tmurt. Ma ɣef uxlaq n yidrimen, neɣ win iwumi qqaren s tefransist tura ‘’La planche à billets’’, yenna-d Amara Benyounes ala tinna i « d tifrat i iwulmen akka tura gar tid i izemren ad ilint », acu kan ilaq wayen ara tt-id-iḍeffren deg useggem n tdamsa tazzayrit, ɣef wakken iwala. Ɣef rray n uselwau n MPA, ur tezmir ara Lezzayer ad tettkel kan ɣef tkebbaniyin tiɣelnawin. Laqent, ɣef wakken i t-id-yenna, tid-nniḍen, tikebbaniyin tusligin (Privées). Aṭas n wawal, dɣa, i yuzlen ɣef yidrimen yemsun i sbbaben i tkabaniyin-agi tineggura, ɣef wakken i d-qqaren kra, acu kan Mass Benyounes, iwala d akken idrimen yumsen ha-ten-in deg rrebrab akked lehyuf (la drogue). « Mi d-isubb yiwen deg udrar, ad yebnu lbaṭima s yidrimen n rrebrar, ad as-iɛelleq deg tewwurt n berra takerḍid-d « Hada min faḍli llah » (ayagi sɣur Rebbi), syin ad d-yaɣ 4/4, ad as-ilesseq « Ma caa llah » (D ayen yebɣa Rebbi). Ɣef wakken i d-yenna Mass Benyounes, d wigi i d idrimen yumsun iɣef ur d-ttmeslayen ara wid-nni yesṭṭuqquten deg wawal. Deg taggara, iwala Benyounes d akken d akabar awḥid i d twaɣit n tmurt u leḥekem n tnemla (socialisme), ur lesliḥ ara. « Ulac tamurt i yegman yis-s deg ddunit merra », ɣef rray-s. S 950 n wumuɣen deg Lezzayer merra, yessaram Umussu agdudan azzayri ad yeṭṭef amḍiq wis tlta deg tefranin-ani n 23 deg unbir i d-iteddun, ɣef wakken i d-qqaren yimḍebbren-is.
Hocine Moula