‘’Timussniwin d usnerni-nsent deg tefriqt ugafa’’, d asentel agejdan iɣef mmeslayen yiselmaden d yimnuda, i yemlalen ddurt iɛeddan deg tesdawit Mulud Mɛemmeri n Tizi Uzzu.
Ɣef teɣzi n sin wussan, wwin-d awal yimussnawen-agi, i d-yusan seg yal tama, ama dagi deg tmurt neɣ deg berra, ɣef yimekwan d wamek i d-yettili wulmud akked uleqqem n tmussniwin deg umezruy deg tmurt n tmazɣa. Asarag amezwaru yefka-t-id Hugh Roberts n tesdawit n Marikan, deg umeslay-is netta, ur yeqbil ara tamuɣli n yimussnawen Bourdieu, Jeanne Favret akked Gellner i d-yeqqaren d akken d assaɣen n timarawt ɣef wayeg tebna tmetti deg tmurt n leqbayel. Sebba n waya, ɣef wakken i t-id-yenna Hugh, d akken imussnawen-agi ur nudan ara s telqayt i wakken ad zren belli llant tuddsiwin-nniḍen ɣef wayeg tebna taddart. Netta yeqqar seg zik d tasertit i iḥekkmen deg tmurt n leqbayel : deg tejmaɛt mačči d assaɣen n timarawt i iferrun timsal. Seg tama-s Anaris Mohamed n tesdawit Mulud Mɛemmri, netta yewwi-d awal, dɣa, ɣef ubeddel akked wudem-nniḍen i yuɣen wassaɣen n timarawt deg tallit-agi i deg-i tettidir taddart n leqbayel anda i d-yella wayen yettḥettimen ɣef yimdanen i wakken ad brun ciṭ i tid n zik u ad ddun akked d tigi n tura. Ma d Karim Salhi n tesdawit, diɣ, n Mulud Mɛemmeri n Tizi Uzzu, yefka-d amek i d-tlul tɣermi deg tudrin n leqbayel. Deg yiwen unadi i yexdem ɣef yiwet n taddart deg tama-agi n Yiǧer, yufa-d d akken ‘’tettlal-d tɣermi-agi deg leqdicat i txeddem taddart. Leqdicat i yettḥatmen fell-as deg tudert-is, yecban asiweḍ n waman, aseqɛed n yiberdan, aseḥbiber ɣef ugama d wayen-nniḍen. D irmad-agi i d-yeslulen tiɣermi deg tallit-agi i deg-i nella’’, i d-yenna-d Mass Salhi Karim. Seg tama n tmeslayt, d Mass Kahlouche Rabah i yerran ddehn-is ɣef umawal n teqbaylit anda i d-yenna d akken ‘’46% n wawal i d-yeqqar umdan yessnen kan taqbaylit, kkan-d seg taɛrabtn, xas ulamma wid i d-yettasen zedɣen deg yidurar n tmurt n leqbayel, i yellan heddren taɛrabt, ttuɣalen ttutlayen taqbaylit’’, i iwala uselmad-agi n tesdawit MMTU. ‘’Tala deg tmurt n leqbayel’’, d asentel-nniḍen i ɣef i temmeslay Halit Sadjia i d-yennan d akken tala mačči kan d amekkan anda i d-ttagmen aman, acu kan d amekkan anda ttemlilint tlawin, heddrent u xeddment leqdicat-nniḍen. ‘’Xas ulamma stehzan deg-sent yimezdaɣ n tmurt n leqbayel seg wasmi i kecmen waman s axxam, acu kan ha-ten-in la ttuɣalen ɣur-sen, u ad tent-seqqɛaden imi i tent-ḥesben d izumal akka tura’’ i twala temsaragt. Deg yimekwan-a u s leqdicat-a i d-ttilint tmussniwin akked usnerni-nsent deg tmetti s umata, zyada ɣef yiɣerbazen akken walan yimussnawen deg temlilit-agi.
Hocine Moula