Akken ad yelḥu yiwen ɣer sdat deg leqdic-is, ilaq ad as-yezwir tayri d lebɣi. Aya d ayen i yeḍran i Uzwaw Xadir Lqadir, neɣ Klek s yisem n tẓuri, mi yuma iḥemmel isenfan n tẓuri, ladɣa win n wunuɣ. Mmi-s n temnaḍt n Yiwaḍiyen, taddart n Cerfa, i ilulen deg yiseggasen n sebɛin, seg send amdur n tnubit i yerra tawriqt d tamdakkelt iɣef yesseftay tiktiwin i as-d-yettasen s usuneɣ n yifɣal (caricatures). Yella iḥerrez tikci-s i yiman-is kan, armi d-tewweḍ tallit ideg yekcem deg kra n tdukkliwin, gar-asent tidukkla “Iles n Umaziɣ” anda yekki deg waṭas n temsikkinin, yerna deg yimeḍqan-nniḍen yemgaraden. Dɣa seg yimir-n i d-yesban taẓuri deg wunuɣ n ufɣul, i yefka tagnit i medden ad gzun aṭas n yiznan i d-yettberriḥ s drus n usuneɣ. Amsefɣul Xadir Lqadir, i iḍefren ad d-yettini ayen yettxemmim s tsusmi i yezmer kan wallaɣ ad as-isel, yelha mliḥ d leqdic-is, werǧin yestehza deg-s. Ɣas qeddac n yiɛewwiqen i d-imuger deg wakud ideg xussen ttawilat, maca aya ur as-yemniɛ ad iger deg usenfar n usufeɣ n udlis n yifɣal. Ur as-yemniɛ ara ad yaweḍ iswi-nni deg useggas n 2001, mi d-yessufeɣ taktabt timezdit, wumi isemma “Trio Gag Caricatures”, akked sin n yimdukkal-is, ɣer Teẓrigin El Amal n Tizi Uzzu. Skud yella dima d imekdi i usnulfu, yekcem Klek ula deg tẓuri n udlag n yixxamen s teklut. Yettcebbiḥ tixxamin n warrac d yimukan-nniḍen s sin n yiɣaniben; aqbur d utrar, s tmussni i d-yekseb, swayes yettgerriz amahil-is. « Seg gar yisenfaren-iw, ssarameɣ ad bnuɣ yiwet n tzeqqa s uɣanib aqbayli amek tella zik deg yixxamen izwawen; s yikufan, acbayli… ». I aɣ-d-yenna unaẓur Xadir Lqadir.
Kaissa Khalifi