Deg ufus aẓelmaḍ i d-yuɣen aẓar seg wul-im, ssentu isennanen n wuzzu, yiwen yiwen. Dbeɛ-it am yitri di ṣṣura-m.. Anef i yidim ad yemmar, yella yiɣed ad yeqqed ljerḥ-im, ad yeqqed tasa-m irun fell-as d iḥemmal. Ad yedbeɛ itri-m am tecraḍ tiberkanin tebrek n wanbuxxen i d-yefka lkanun ilem mi texsi tmes-is. Ccbaḥa n wuḍan, d igenni imi ara d-yettru d itran yemmalen abrid n laṣel, ttaken-d tafat yettqerriɛen nnger ɣef teqbaylit, ɣef timmuzɣa. Di ssḥari iṛuccen s wureɣ, ur tthabi tikli, itri-m d anagi n iḥerriyen ur nebri i tlelli. I usemmiḍ n Askrem, i yzeblac n Tassili, i tezweɣ n tgurarin, lḥu s ccnawi n uhellil i d-yessakayen itran yeddren di tira-m. Itran, ay isekkilen n tafat yettarun s idammen n umennuɣ. Aru-t s yiles-is iɛerden tagella d lmelḥ gar wid igan amur i yiseɣ. Crurdet acrured n tsekkurt, ɛellit deg yigenwan am yisekkilen n ugeffur yecqirriwen iṭij. Arut tira n wul iwalan wid werǧin walant wallen, azeɣbub-nni n usirem i d-ssegman deg wul-is akken ur yettuɣal sennin am tedmarin-is. Arut ay itran deg ufus azelmaḍ, ceɛlent teftilin am umeclux n lfeṭṭa yerran yir lfal, akin i tlisa.
Zira