« Asideg », d awal-a amaynut ara yuɣalen deg kra n yiseggasen amzun d aqbur. Nezmer ad d-nini asideg d asuqel s kra n teteknikin i ssnen wid yesseqdacen allalen isenselkamen, neɣ d imsenselkamen s timmad-nsen. Iseggasen-a ineggura dɣa, d tagrawla i yeḍran deg usideg n yifecka isenselkamen d yidigan web, d yiseɣẓanen ɣer tutlayt n Mulud At Mɛemmer. Amsideg Muḥend Belqasem d terbaɛt-is, ssawḍen ad d-ssidgen aṭas n wallalen isenselkamen d yiseɣẓanen n uselkim ɣer tezwawt, armi tuɣal tutlayt-a tesɛa amkan gar tutlayin timeqqranin n umaḍal, abeɛda taglizit d tefransist. Seg Utorrent, Skype, Evernote, Mozilla, Thunderbird, Open Office, Wikipedia d yigburen-is, VK aẓeṭṭa inmetti arusi, CD LR d wiyaḍ, uɣalen merra zemren ad ttwasqedcen s tutlayt tazwawt, sɣur yal yiwen akken yebɣu yili uswir-is n tɣuri neɣ n tmussni-s tasenselkimt. Ugur yellan ar tura d tuqin n yimsidag ara d-yernun i terbaɛt akken ad temɣur, imi simmal ttnernin yisenfaren, simmal yettimɣur uqeddic, yessutur-d ugar n yifassen. Seg terbaɛt-a n usideg azwaw i yeddmen acqirrew, ad d-nebder Muḥend Belqasem, Sliman Ɛmiri, Mhenni Xalifi, Nasira Ɛebrus, Farid At Musa d wiyaḍ. Yal yiwen seg-sen, yegza asuter n tallit-a d umennuɣ-nniḍen i d-yessutur umaḍal umḍin akken ad tidir tutlayt, ad taẓ ɣer sdat. « Asideg mačči d asihel. Yewɛer lḥal d tidet i ɛecra n yiɛeggalen ad suqlen ifecka igejdanen i yettilin deg Internet. Taluft, tessutur-d aṭas n wakud, aṭas n ssber, d waṭas n yifassen ladɣa ». I d-yenna Mhenni Xalifi yiwen seg terbaɛt n yimsidag, send ad d-yernu: « Yella daɣen yiwen n wugur ur d-yekka ara sɣur-neɣ, maca yekka-d sɣur yiseqdacen Izwawen n Internet. A win yufan wid yesseqdacen Mozilla, Skype d wiyaḍ, s tutlayin-nniḍen, mi ara ḥsun uɣalen-d ɣer tezwawt, ad ten-id-zedmen dindin, ad ten-sseqdacen. Wagi d ugur ameqqran i nɛerreḍ ad t-nefru s udellel d tiɣriwin, ama di Facebook neɣ di tɣamsa. Acku allal neɣ aseɣẓan yettwasuqlen, ilaq ad yettwasseqdec sɣur wat-is, ma ulac ad yemmet ». Ad d-nesmekti kan d akken imsidag-a, mačči d tadrimt i ten-yecqan, imi ccɣel-nsen xeddmen-t baṭṭel. Wannag iswi-nsen d asdukkel n tutlayt-nsen akked yakk tutlayin n umaḍal. Aya, ad yeḍmen i tsuta i d-iteddun asnerni n tzemmar n tutlayt-nsen deg umaḍal umḍin. Isenfaren n usideg ttkemmilen ihi, mazal daɣen ad d-nnulfun wiyaḍ deg useggas n 2018 i d-iteddun. Nessaram ihi aṭas ara yernun ɣer terbaɛt n usideg akken seg tama-nsen ad kkin deg usnerni n tutlayt deg Internet.
Kaissa Khalifi