Sdat n wanawen n wagguren-agi ineggura i d-yexdem uneɣlaf amezwaru n tmur n Lezzayer, Mass Ahmed Ouyahia i wugdud, ɣef liḥala n tdamsa n tmurt ur nessefraḥ ara, yezdeɣ lxuf imezdaɣ s leɣla n temɛict i seg ara d-yeglu useggas n 2018.
Dɣa deg taluft yecban tagi, imḍebbren n tmurt n Lezzayer, suffɣen-d aṭas n yisaḍufen d lebḍanat i lmendad n uselḥu n lecɣal n tmurt mgal taluft -agi i iɛeggben akk iḥricen n tdamsa, maca, daɣen, aya dayen d d-yeglun s waṭas n yinelkamen ɣef liḥala n temɛict n ugdud azzayri. Dɣa asaḍuf n tedrimt n 2018, qeblen s tuget yiɛeggalen n Usqamu aɣerfan aɣelnaw (APN), d uneḥbus n waṭas n yisufer ara d-tawi tmurt seg tmura-nniḍen , aya yak ad d-yeglu s tmerna deg waṭas n yisufar n tudert n yal ass, dɣa asaḍuf n tedrimt, ijerred deg yiwen gar imagraden-is, timerna deg leswami n yisufar n trisiti, lgaz, aman, lmazut d lissens, ayen ara d-yeglun s tmerna deg leswami n yeḥricen-nniḍen n tdamsa. Sdat n liḥala-agi, imezdaɣ n Tiz-Uzzu, yezedɣ-iten lxuf meqqren ɣef leɣla n temɛict swayeg ara d-yeglu useggas amaynut 2018, dɣa deg wussen-agi, bdant swami n yisufar s tmerna, aya yeɛna dɣa isufar n lxedra yeqquren : laɛdes, lubyan, lḥemmes d waṭas-nniḍen. »Yiwet n liḥala ur nesefraḥ ara akk imdanen, imi yal mi ara ibeddel useggas, igduden n tmura n umaḍal ferḥen s useggas ajdid, ma d nekni nḥezzen s yal aseggas ajdid s sebba n yir liḥala n uselḥu n lecɣal n lmurt » Dayen i seg yesḥisef yiwen umezdaɣ n tɣiwant n Buzeggan. Deg liḥala yecban tagi ur nessefraḥ ara akk , aṭas n yilmeẓyen , bɣan ad ruḥen ɣer tmura-nniḍen anda i nwan ad afen ayen i bɣan.
Ali Zalouk