Am wakken i t-id-tɛeggen yakan deg wahil-is, kra n wussan ɣer deffir, thegga-d ddurt-a yezrin tdukkla tinmettit i yimeɛḍar d Yimuḍan Idumen « Tiɣri » n Ayt Smaɛel yiwen n wahil d amerkanti i usḥulfu n yimezdaɣ d yibabaten tugart, ɣef umihi i d-ttawin kra n wuraren n uẓeṭṭa n internet i warrac d yinubiyen. I lmend n waya, llan-d yisaragen, timsikniyin d usenzu s ubuddu n wammud n yisefra n Ɛezzun Ḥmed. Akken, ugar n yimsaragen i d-yewwin awal s teɣzi ɣef taluft-a, aṭas i iḥeḍren i ttiɛad, nnan-d awal-nsen, am uselway n tɣiwant n Ayt Smaɛel, taselwayt n tdayra, ccix n lǧameɛ akked temsulta d yijadarmiyen. Gar wid i d-igan isaragen, ad d-nebder Massa Muḥemmadi Xadiǧa, Zemmuri Lwiza d Fares Idir, i d-yemmeslayen s umata ɣef uḥric n tnefsit d wamek ttwaṭṭafen warrac s tazzla deg tqeffet n yir uraren-a. Ula d ttrebga n yimawlan tettwabder-d s telqey, imi ulac win ara iɛassen tarwa d wayen xeddmen ma mačči d nutni. Ladɣa mi nettwali simmal berrun kra n lwaldin i ddabir agaman i sɛan ɣef teḍfert-nsen. Ɣef taluft-a dɣa, yenna-aɣ-d yiwen n ubabat seg Ayt Smaɛel: « Ma yewwi-d ad sḍelmeɣ albaɛḍ mi ara yekcem ugrud deg wuraren ifuḥanen, nekk ad sḍelmeɣ imawlan-is tazwara. Aqcic a-t-an ddaw leɛnaya-nsen nutni skud urɛad yessif ». Merra, walan, yesmurres ayendin warmud-a (activité) n Tiɣri, i yekkan seg tsebḥit armi d tazwara n tmeddit.
M. K.